នយោបាយរបស់ប្រទេសថៃ កំពុងតែស្ថិតក្នុងភាពវឹកវរយ៉ាងចលាចលនាថ្ងៃពុធ (៣ កញ្ញា) នេះ ខណៈដែលគណបក្សភឿថៃ ដែលកំពុងកាន់អំណាច ប្រកាសថា ខ្លួនបានដាក់រាជក្រឹត្យទៅអង្គព្រះមហាក្សត្រដើម្បីស្នើរំលាយសភា និងដើម្បីបើកផ្លូវឱ្យមានការបោះឆ្នោតថ្មីមួយ ភ្លាមៗបន្ទាប់ពីបក្សប្រឆាំងដ៏ធំបំផុតនៅក្នុងសភាបាននិយាយថា ខ្លួននឹងគាំទ្រគណបក្សមួយផ្សេងទៀតដើម្បីបង្កើតរដ្ឋាភិបាលថ្មី។

ប្រធានបក្សភឿថៃ ដែលកាលពីសប្តាហ៍មុនបានបាត់បង់នាយករដ្ឋមន្ត្រីរបស់ខ្លួន គឺលោកស្រី ផែថងថាន ស៊ីណាវ៉ាត់ ក្រោមសេចក្តីសម្រេចរបស់តុលាការ បានប្រាប់សារព័ត៌មានរ៉យទ័រថា គណបក្សនេះបានសម្រេចចិត្តឆ្ពោះទៅមុខ ជាមួយនឹងវិធានការស្វះស្វែងរកការបោះឆ្នោតមុនអាណត្តិ។

ចំណាត់ការរបស់បក្សភឿថៃ ក្នុងការរំលាយសភា បានកើតឡើងនៅពេលបក្សប្រជានិយមដែលធ្លាប់តែមានឥទ្ធិពលមួយនេះ បាននឹងកំពុងបាត់បង់ការគាំទ្រយ៉ាងខ្លាំង ហើយក៏ប្រឈមនឹងការតវ៉ាដ៏តានតឹងប្រឆាំងនឹងរបបគ្រប់គ្រងរបស់ខ្លួនផងដែរ។ ទាក់ទងនឹងរឿងនេះ មានមតិផ្ទុយគ្នាជាច្រើនក្នុងចំណោមអ្នកជំនាញច្បាប់នៅប្រទេសថៃ ថាតើរដ្ឋាភិបាលចាំផ្ទះមានសិទ្ធិអំណាចក្នុងការរំលាយសភាដែរឬទេ។

នៅមុននោះ គណបក្សប្រជាជនថៃ ដែលជាបក្សប្រឆាំងដ៏ធំគ្រប់គ្រងជិតមួយភាគបីនៃអាសនៈសភាជាន់ទាប បាននិយាយថា ខ្លួនកំពុងគាំទ្រមេដឹកនាំដ៏មានមហិច្ឆតារបស់បក្សភូមិចៃថៃ ដែលជាគូប្រជែងរបស់បក្សភឿថៃ គឺលោក អានុទិន ឆានវីរគុល ឱ្យធ្វើជានាយករដ្ឋមន្ត្រីថ្មី៕