ប្រទេសថៃប្រឈមបញ្ហាសេដ្ឋកិច្ចស្របពេលមានភាពមិនច្បាស់លាស់ខាងនយោបាយ ហើយក្រុមអ្នកជំនាញព្យាករពីការកាត់អត្រាការប្រាក់ ០,៥% ពីធនាគារថៃក្នុងខែតុលា។  

សារព័ត៌មាន Bloomberg កាលពីថ្ងៃអង្គារបានរាយការណ៍ថាភាពចលាចលនយោបាយក្នុងប្រទេសថៃអាចនាំឱ្យមានការធ្លាក់ចុះបណ្តោះអាសន្នសម្រាប់កំណើនសេដ្ឋកិច្ចរបស់ប្រទេសនេះ ។ បន្ទាប់ពីសេចក្ដីសម្រេចរបស់តុលាការធម្មនុញ្ញដកលោកស្រី Paetongtarn Shinawatra ចេញពីតំណែងជានាយករដ្ឋមន្ត្រីកាលពីថ្ងៃទី ៣០ ខែសីហា ពីបទបំពានក្រមសីលធម៌ធ្ងន់ធ្ងរ មានការប្រកួតប្រជែងកាន់តែខ្លាំងរវាងគណបក្សភឿថៃ និង ភូមិចៃថៃ (Bhumjaithai) ដើម្បីតែងតាំងនាយករដ្ឋមន្ត្រីថ្មី ទោះពេលនេះគណបក្សភូមិចៃថៃ ទទួលបានការគាំទ្រក្នុងការបង្កើតរដ្ឋាភិបាលថ្មីពីបក្សប្រឆាំង គឺគណបក្សប្រជាជនថៃក៏ដោយ។

នយោបាយរបស់ប្រទេសថៃ កំពុងតែស្ថិតក្នុងភាពមិនច្បាស់លាស់នៅថ្ងៃពុធ សប្ដាហ៍នេះ ដោយគណបក្សកាន់អំណាច ភឿថៃ បានប្រកាសថា ខ្លួនបានដាក់រាជក្រឹត្យទៅកាន់ព្រះមហាក្សត្រដើម្បីរំលាយសភា រួចរាល់ហើយ និងដើម្បីឱ្យមានការបោះឆ្នោតថ្មីមួយក្នុងពេល៣ខែខាងមុខ។ ។

លោកស្រី Lavanya Venkateswaran សេដ្ឋវិទូនៅធនាគារ OCBC ក្នុងប្រទេសសិង្ហបុរី បាននិយាយថា ប្រសិនបើអស្ថិរភាពនយោបាយនាំទៅដល់ការរំលាយសភា ដំណើរការនេះអាចអូសបន្លាយ និងដាក់សម្ពាធបន្ថែមទៀតលើសន្ទុះកំណើនសេដ្ឋកិច្ចដ៏ទន់ខ្សោយរបស់ថៃ។    

លោកស្រីបានកត់សម្គាល់ថា សេដ្ឋកិច្ចរបស់ប្រទេសថៃកំពុងស្ថិតក្រោមសម្ពាធពីគោលនយោបាយពន្ធរបស់ប្រធានាធិបតីសហរដ្ឋអាមេរិកលោក Donald Trump និងការប៉ះទង្គិចព្រំដែនជាមួយប្រទេសជិតខាង។ រដ្ឋាភិបាលបានប៉ាន់ប្រមាណថា កំណើនសេដ្ឋកិច្ចនៅឆ្នាំ ២០២៥នេះ នឹងជាមធ្យមត្រឹមតែ ២% ប៉ុណ្ណោះ ដែលទាបជាងប្រទេសជិតខាងដូចជា ឥណ្ឌូនេស៊ី និងហ្វីលីពីនជាដើម៕