មន្ត្រីជាន់ខ្ពស់អ៊ីរ៉ង់បាននិយាយកាលពីថ្ងៃអង្គារ (២ កញ្ញា)ថា ច្រកទៅកាន់ការចរចានុយក្លេអ៊ែររវាងអ៊ីរ៉ង់ និងសហរដ្ឋអាមេរិក មិនត្រូវបានបិទឡើយប៉ុន្តែការទាមទាររបស់ទីក្រុងវ៉ាស៊ីនតោនសម្រាប់ការទប់ស្កាត់មីស៊ីលអ៊ីរ៉ង់ កំពុងរារាំងដល់ការរំពឹងទុកសម្រាប់កិច្ចចរចា។

ជុំទី៦នៃការចរចារវាងអ៊ីរ៉ង់ និងអាមេរិក ត្រូវបានផ្អាក បន្ទាប់ពីសង្គ្រាមរយៈពេល១២ថ្ងៃកាលពីខែមិថុនា នៅពេលដែលអ៊ីស្រាអែល និងសហរដ្ឋអាមេរិក បានវាយប្រហារលើរោងចក្រនុយក្លេអ៊ែរអ៊ីរ៉ង់ ហើយទីក្រុងតេអេរ៉ង់ បានសងសឹកវិញដោយការបាញ់ស្រោចមីស៊ីលបាលីស្ទីកទៅលើអ៊ីស្រាអែល។

លោក Ali Larijani រដ្ឋមន្ត្រីក្រុមប្រឹក្សាសន្តិសុខជាតិជាន់ខ្ពស់របស់អ៊ីរ៉ង់បាននិយាយនៅក្នុងការប្រកាសនៅលើបណ្តាញ X ថា «យើងពិតជាត្រូវបន្តការចរចាដោយសមហេតុផល ហើយតាមរយៈការលើកឡើងពីបញ្ហាដែលមិនអាចយល់បានដូចជាការរឹតត្បិតមីស៊ីល ពួកគេបានកំណត់ច្រកដែលបដិសេធការចរចាណាមួយ»។

រដ្ឋាភិបាលប្រទេសលោកខាងលិច បារម្ភថា កម្មវិធីចម្រាញ់សារធាតុអ៊ុយរ៉ានីញ៉ូមរបស់អ៊ីរ៉ង់ អាចផលិតសម្ភារៈសម្រាប់ក្បាលគ្រាប់អាតូមិកហើយអ៊ីរ៉ង់អាចស្វែងរកការអភិវឌ្ឍមីស៊ីលដែលមានសមត្ថភាពផ្ទុកក្បាលគ្រាប់បាន។ អ៊ីរ៉ង់ បានច្រានចោលការចោទប្រកាន់ទាំងនោះ ដោយនិយាយថា កម្មវិធីនុយក្លេអ៊ែររបស់ខ្លួនគឺសម្រាប់តែគោលបំណងថាមពលស៊ីវិលប៉ុណ្ណោះ ហើយសមត្ថភាពការពារជាតិរបស់ខ្លួនរួមទាំងមីស៊ីល គឺមិនអាចចរចារបានឡើយ។

ការអត្ថាធិប្បាយរបស់លោក Larijani ធ្វើឡើងប៉ុន្មានថ្ងៃបន្ទាប់ពីប្រទេសបារាំង អាល្លឺម៉ង់ និងអង់គ្លេសបានជំរុញ «ការយកមកប្រើប្រាស់យន្តការចាស់» ដែលអាចដាក់ទណ្ឌកម្មរបស់អង្គការសហប្រជាជាតិឡើងវិញលើទីក្រុងតេអេរ៉ង់ ជុំវិញសកម្មភាពនុយក្លេអ៊ែររបស់ខ្លួន។