លោកប្រធានាធិបតី Donald Trump បាននិយាយកាលពីថ្ងៃអង្គារ ទី២ ខែកញ្ញាថា លោកមានផែនការបញ្ជូនទាហានឆ្មាំជាតិសហរដ្ឋអាមេរិកដើម្បីប្រយុទ្ធប្រឆាំងនឹងឧក្រិដ្ឋកម្មនៅក្នុងទីក្រុង Chicago ប៉ុន្តែបានបដិសេធមិនផ្តល់ពេលវេលាជាក់លាក់នៃការដាក់ពង្រាយនោះទេ។

អភិបាលក្រុង Chicago លោក Brandon Johnson បាននិយាយកាលពីចុងសប្តាហ៍ថា នគរបាលទីក្រុង Chicago នឹងមិនសហការជាមួយកងទ័ពឆ្មាំជាតិ ឬភ្នាក់ងារសហព័ន្ធណាមួយឡើយ ប្រសិនបើ លោក Trump ដាក់ពង្រាយកងទ័ពទៅកាន់ទីក្រុងក្នុងប៉ុន្មានថ្ងៃខាងមុខខណៈលោកបានគំរាមកំហែងកាលពីពេលមុនេះ។

លោក Trump បានប្រាប់អ្នកសារព័ត៌មានដែលមកប្រមូលផ្តុំគ្នានៅក្នុងការិយាល័យ Oval Office ថា «យើងនឹងចូលទៅ។ ខ្ញុំមិននិយាយថានៅពេលណាទេ ប៉ុន្តែយើងនឹងចូលទៅទីក្រុងនោះ»។

លោក Trump នៅចំណុចមួយបាននិយាយថាលោកចង់បានសំណើពីអភិបាលក្រុង «ខ្ញុំចង់ទទួលការហៅទូរស័ព្ទពីអភិបាលរដ្ឋ និងអភិបាលក្រុងដែលនិយាយថាពួកគេត្រូវការជំនួយ»។

លោក Trump កំពុងគំរាមពង្រីកការបង្រ្កាបរបស់សហព័ន្ធរបស់លោកលើទីក្រុងនានានៅសហរដ្ឋអាមេរិកដែលដឹកនាំដោយគណបក្សប្រជាធិបតេយ្យទៅកាន់ទីក្រុង Chicago ដោយប្រើប្រាស់អំណាចប្រធានាធិបតីជាកិច្ចខិតខំប្រឹងប្រែងបន្ទាន់ដើម្បីដោះស្រាយឧក្រិដ្ឋកម្ម ទោះបីជាមន្ត្រីទីក្រុងលើកឡើងពីការថយចុះនៃឃាតកម្ម អំពើហិង្សាដោយកាំភ្លើង និងចោរកម្មក៏ដោយ។