បែលហ្សិក៖ ការតវ៉ាប្រឆាំងទៅនឹងការចាក់វ៉ាក់សាំងបង្ការវីរុស COVID-19 និងវិធានការរឹតត្បិតនៅទីក្រុងព្រុចសែលកាលពីថ្ងៃអាទិត្យ បានទាក់ទាញអ្នកចូលរួមរាប់ពាន់នាក់មកពីទូទាំងទ្វីបអឺរ៉ុប។ បាតុករជនជាតិបែលហ្ស៊ិកម្នាក់បាននិយាយថា វាជាបាតុកម្មលក្ខណៈអន្តរជាតិដែលមានប្រជាជនមកពីប្រទេសហូឡង់ អាល្លឺម៉ង់ បារាំង អ៊ីតាលី និងមកពីប្រទេសប៉ូឡូញ។
មុនឈានដល់ការបញ្ចប់នៃការប្រមូលផ្តុំគ្នា មានការប្រឈមមុខដាក់គ្នាដោយហិង្សារវាងបាតុករ និងនគរបាល។ បាតុករបែលហ្ស៊ិកម្នាក់ទៀតបាននិយាយថា លោកចង់បានជីវិតដូចកាលពីពេលមុនត្រឡប់មកវិញ។ លោកនិយាយថា យើងអាចធ្វើការ ប៉ុន្តែយើងមិនអាចរៀបចំពិធីជប់លៀងបានទេ។ ការតវ៉ាបានធ្វើឡើង បន្ទាប់ពីមានបាតុកម្មនៅក្នុងរដ្ឋធានីនៅទ្វីបអឺរ៉ុបផ្សេងទៀតកាលពីថ្ងៃសៅរ៍ ដែលបានទាក់ទាញអ្នកតវ៉ារាប់ពាន់នាក់ប្រឆាំងលិខិតឆ្លងដែនវ៉ាក់សាំង និងតម្រូវការផ្សេងទៀតដែលរដ្ឋាភិបាលអឺរ៉ុបបានដាក់ចេញ ខណៈដែលករណីឆ្លងវីរុស COVID-19 ប្រចាំថ្ងៃ និងការចូលសម្រាកព្យាបាលនៅមន្ទីរពេទ្យបានកើនឡើង ដោយសារតែវីរុសបម្លែងខ្លួនថ្មី Omicron។ ក្រុមអ្នកតវ៉ាបានបំផ្លាញរបាំងការពាររបស់នគរបាល និងបានវាយប្រហារទៅលើមន្ត្រីមួយក្រុមនៅក្នុងបាតុកម្មប្រឆាំងការចាក់វ៉ាក់សាំង និងវិធានការរឹតត្បិតក្នុងទីក្រុងព្រុចសែលកាលពីថ្ងៃអាទិត្យ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
