បញ្ជាការប្រតិបត្តិរបស់កងកម្លាំងប្រដាប់អាវុធប៉ូឡូញ បាននិយាយថា យន្តហោះចម្បាំងប៉ូឡូញ និងសម្ព័ន្ធមិត្ត ត្រូវដាក់ឱ្យសកម្មនៅថ្ងៃពុធ (៣ កញ្ញា) នេះ ប្រុងប្រៀបដើម្បីធានាសុវត្ថិភាពដែនអាកាសប៉ូឡូញ បន្ទាប់ពីរុស្ស៊ី បានបើកការវាយប្រហារតាមផ្លូវអាកាសសំដៅទៅលើភាគខាងលិចអ៊ុយក្រែន នៅជិតព្រំដែនជាមួយប៉ូឡូញ។

បញ្ជាការប្រតិបត្តិប៉ូឡូញនោះ បាននិយាយលើបណ្ដាញសង្គម X ថា "សហព័ន្ធរុស្ស៊ី ជាថ្មីម្តងទៀត កំពុងវាយប្រហារលើគោលដៅក្នុងទឹកដីអ៊ុយក្រែន"។ ការបង្ហោះនេះបន្តថា៖ "ដើម្បីធានាសុវត្ថិភាពផ្លូវអាកាស... យន្តហោះប៉ូឡូញ និងសម្ព័ន្ធមិត្តកំពុងប្រតិបត្តិការយ៉ាងសកម្មក្នុងដែនអាកាសប៉ូឡូញ ខណៈប្រព័ន្ធការពារដែនអាកាស និងប្រព័ន្ធឈ្លបយកការណ៍ជើងគោក ស្ថិតក្នុងស្ថានភាពត្រៀមខ្លួនខ្ពស់បំផុត"។

ទន្ទឹមនឹងនេះ នៅម៉ោងសកល ០១:៤០នាទី យប់ឈានចូលថ្ងៃពុធនេះ ផ្នែកទាំងអស់របស់អ៊ុយក្រែន ស្ថិតក្រោមការជូនដំណឹងអាសន្នពីការវាយឆ្មក់តាមអាកាស បន្ទាប់ពីការព្រមានរបស់កងទ័ពអ៊ុយក្រែន ថារុស្ស៊ីត្រៀមបើកការវាយប្រហារដោយមីស៊ីល និងដ្រូន។ រដ្ឋបាលយោធារបស់ទីក្រុងគីវ បាននិយាយនៅថ្ងៃពុធដដែលនេះថា អង្គភាពការពារដែនអាកាសអ៊ុយក្រែន បានទប់ទល់ការវាយប្រហារផ្លូវអាកាសពីរុស្ស៊ី លើទីក្រុងគីវ។

មីស៊ីលរបស់រុស្ស៊ី និងអ៊ុយក្រែន ពេលខ្លះបានឆ្លងចូលដែនអាកាសប៉ូឡូញ និងសមាជិកណាតូផ្សេងទៀត។ កាលឆ្នាំ២០២២ មនុស្សពីរនាក់ត្រូវបានសម្លាប់នៅភាគខាងកើតប៉ូឡូញ នៅក្នុងអ្វីដែលការិយាល័យរដ្ឋអាជ្ញាប៉ូឡូញនិយាយថា ដោយសារមីស៊ីលការពារដែនអាកាសអ៊ុយក្រែន S-300 ដែលបាញ់ធ្លាក់ចេញពីផ្លូវហោះហើរ ក្នុងអំឡុងការវាយប្រហាររបស់រុស្ស៊ី៕