ទិន្នន័យពីក្រសួងសុខាភិបាលដែនដីហ្កាហ្សា បានបង្ហាញកាលពីថ្ងៃអង្គារ (២ កញ្ញា) ថា មនុស្សសរុបចំនួន ១៨៥នាក់ នៅហ្កាហ្សា បានស្លាប់ "ដោយសារកង្វះអាហារូបត្ថម្ភ" ធ្ងន់ធ្ងរនៅក្នុងខែសីហា ខណៈមនុស្ស ១៣នាក់បន្ថែមទៀត រួមទាំងកុមារ ៣នាក់ បានស្លាប់ក្នុងពេល ២៤ម៉ោងកន្លងទៅនោះ ដោយសារឥទ្ធិពលមហន្តរាយទុរ្ភិក្ស ដែលបង្កឡើងដោយអ៊ីស្រាអែល កាន់តែអាក្រក់ទៅៗ។

សេចក្តីថ្លែងការណ៍និយាយថា មនុស្សយ៉ាងតិច ៨៣នាក់ រួមទាំងកុមារ ១៥នាក់ បានស្លាប់ ចាប់តាំងពីអង្គការបែងចែងដំណាក់កាលសន្តិសុខស្បៀងរួម (IPC) ដែលជាប្រព័ន្ធត្រួតពិនិត្យភាពអត់ឃ្លានជាសកលគាំទ្រដោយអង្គការសហប្រជាជាតិ បានប្រកាសកាលពីខែមុនថា ផ្នែកខ្លះនៃតំបន់ហ្កាហ្សា កំពុងទទួលរងនូវគ្រោះទុរ្ភិក្សយ៉ាងពេញទំហឹង។

អាជ្ញាធរសុខាភិបាលនេះនិយាយទៀតថា កុមារ ៤៣.០០០នាក់ អាយុក្រោម ៥ឆ្នាំ កំពុងទទួលរងកង្វះអាហារូបត្ថម្ភ រួមជាមួយស្ត្រីមានផ្ទៃពោះ និងស្រ្តីបំបៅដោះកូនជាង ៥៥.០០០នាក់ ដោយបន្ថែមថា ពីរភាគបីនៃស្ត្រីមានផ្ទៃពោះមានអាការៈស្លេកស្លាំង (កោសិកាឈាមក្រហមមិនគ្រប់គ្រាន់) ដែលជាអត្រាខ្ពស់បំផុតក្នុងពេលជាច្រើនឆ្នាំ ហើយម្តាយ និងទារកទើបកើត មានហានិភ័យបំផុតពីកង្វះអាហារូបត្ថម្ភ។

ជារួម ក្រសួងនេះនិយាយថា ចំនួនអ្នកស្លាប់ទាក់ទងនឹងភាពអត់ឃ្លានសរុបក្នុងតំបន់ហ៊ុមព័ទ្ធពេលនេះមានចំនួន ៣៦១នាក់ រួមទាំងកុមារ ១៣០នាក់ ចាប់តាំងពីការចាប់ផ្តើមនៃសង្រ្គាមរបស់អ៊ីស្រាអែល នៅលើតំបន់ហ្កាហ្សា ក្រោយការវាយប្រហាររបស់ពួកហាម៉ាស នៅថ្ងៃទី៧ ខែតុលា ឆ្នាំ២០២៣មក៕