ក្រុមហ៊ុនផលិតសារធាតុគីមីនៅអឺរ៉ុប កំពុងប្រឈមនឹងភាពចលាចលថ្មី ខណៈពន្ធនាំចូលរបស់សហរដ្ឋអាមេរិក បានរំខានដល់ពាណិជ្ជកម្មសកល ដែលជំរុញឱ្យអតិថិជនពន្យារពេលការបញ្ជាទិញ និងប៉ះពាល់ដល់តម្រូវការក្នុងវិស័យដែលកំពុងជួបការលំបាកស្រាប់ទៅហើយ ក្នុងការងើបឡើងវិញពីវិបត្តិថាមពលឆ្នាំ២០២២ ក្នុងតំបន់។

សារធាតុគីមីជាការនាំចេញធំបំផុតទី៤ របស់សហភាពអឺរ៉ុប បន្ទាប់ពីគ្រឿងម៉ាស៊ីន រថយន្ត និងឱសថ ហើយបានជួបបញ្ហាប្រឈមក្នុងប៉ុន្មានឆ្នាំថ្មីៗនេះ ជាមួយនឹងតម្លៃផលិតកម្មខ្ពស់ ខណៈតម្លៃឧស្ម័ន និងថាមពលកើនឡើងខ្លាំង ដោយសារជម្លោះរុស្ស៊ី-អ៊ុយក្រែន។

ចំណុចប្រកួតប្រជែងបែបនេះ និងការធ្លាក់ចុះតម្រូវការព្រោះតែឧស្សាហកម្មសំខាន់ៗក៏ជួបការលំបាក បាននាំឱ្យក្រុមហ៊ុនមួយចំនួនក្នុងវិស័យសារធាតុគីមីមានតម្លៃ ៦៥៥ពាន់លានអឺរ៉ូ (៧៦៧ ពាន់លានដុល្លារ) បិទទីតាំងផលិត និងកាត់បន្ថយការងារដើម្បីសន្សំការចំណាយ។ ប្រាក់ចំណូលត្រីមាសទី៣ របស់ក្រុមហ៊ុនគីមីអឺរ៉ុប រំពឹងថានឹងធ្លាក់ចុះ ៥% បន្ទាប់ពីការធ្លាក់ចុះ ២២% រួចទៅហើយក្នុងត្រីមាសទីពីរ នេះបើយោងតាមទិន្នន័យរបស់ស្ថាប័ន LSEG ។

ពន្ធនាំចូលរបស់អាមេរិក ១៥% លើទំនិញពីសហភាពអឺរ៉ុប បានប៉ះពាល់ដល់អតិថិជនសំខាន់ៗរបស់ឧស្សាហកម្មនេះ រួមទាំងក្នុងវិស័យរថយន្ត គ្រឿងចក្រ និងទំនិញប្រើប្រាស់ផងដែរ។ ក្រុមហ៊ុនផលិតរថយន្តសកល បានបញ្ជាទិញសារធាតុគីមីតិចជាងមុនដល់ទៅរាប់ពាន់លានដុល្លារ ដោយសារការខូចខាតពីសង្គ្រាមពាណិជ្ជកម្ម៕