រដ្ឋមន្ត្រីការបរទេសរុស្ស៊ី លោក Sergei Lavrov បាននិយាយក្នុងសុន្ទរកថាចេញផ្សាយថ្ងៃពុធ (៣ កញ្ញា) នេះថា ទីក្រុងមូស្គូ រំពឹងថា កិច្ចពិភាក្សាសន្តិភាពរុស្ស៊ី និងអ៊ុយក្រែន នឹងបន្តទៅមុខ ប៉ុន្តែការពិតនៃការផ្លាស់ប្ដូរទឹកដីថ្មី ត្រូវមានការទទួលស្គាល់ ហើយប្រព័ន្ធថ្មីនៃការធានាសន្តិសុខ ត្រូវតែបង្កើតឡើង។

រុស្ស៊ី បានបញ្ជូនទ័ពរាប់ម៉ឺននាក់ វាយចូលអ៊ុយក្រែន ក្នុងខែកុម្ភៈ ឆ្នាំ២០២២ បន្ទាប់ពីមានការប្រយុទ្ធគ្នារយៈពេល ៨ឆ្នាំ នៅភាគខាងកើតអ៊ុយក្រែន រវាងក្រុមផ្តាច់ខ្លួនគាំទ្រដោយរុស្ស៊ី និងកងទ័ពអ៊ុយក្រែន។ ក្រោយសង្រ្គាមជាង ៣ឆ្នាំមកនេះ រុស្ស៊ីគ្រប់គ្រងបានជិតមួយភាគប្រាំនៃទឹកដីអ៊ុយក្រែន។

គេហទំព័ររបស់ក្រសួងការបរទេសរុស្ស៊ី បានស្រង់សម្ដីលោក Lavrov ថា៖ «ដើម្បីឱ្យសន្តិភាពស្ថិតស្ថេរយូរអង្វែង ភាពជាក់ស្តែងនៃទឹកដីថ្មី ត្រូវតែមានការទទួលស្គាល់ និងផ្ដល់ភាពផ្លូវការក្នុងលក្ខខណ្ឌច្បាប់អន្តរជាតិ»។ សុន្ទរកថាបន្តថា៖ «ប្រព័ន្ធថ្មីនៃការធានាសន្តិសុខសម្រាប់រុស្ស៊ី និងអ៊ុយក្រែន ត្រូវតែបង្កើតឡើងជាធាតុសំខាន់នៃស្ថាបត្យកម្មឆ្លងទ្វីប នៃសន្តិសុខស្មើគ្នា និងមិនអាចបំបែកបាននៅអាស៊ីអឺរ៉ុប»។

លោក Lavrov ក៏បាននិយាយប្រឆាំងបែបប្រយោលចំពោះសមាជិកភាពអ៊ុយក្រែន ក្នុងអង្គការណាតូ ដោយលើកឡើងថា «អ៊ុយក្រែនត្រូវធានាភាពអព្យាក្រឹត មិនចូលបក្សសម្ព័ន្ធ និងមិនមាននុយក្លេអ៊ែរ»។ អ៊ុយក្រែនវិញនិយាយថា មិនមែនស្រេចលើរុស្ស៊ីទេ ដែលថាអ៊ុយក្រែនអាចឬមិនអាចចូលណាតូបាន ខណៈណាតូក៏និយាយថា រុស្ស៊ីមិនអាចប្រើសិទ្ធិវេតូបានដែរ លើសមាជិកភាពនៃសម្ព័ន្ធយោធាដែលបង្កើតឡើងក្នុងឆ្នាំ១៩៤៩ ដើម្បីប្រឆាំងនឹងការគំរាមកំហែងពីសហភាពសូវៀត៕