ការស៊ើបអង្កេតមួយត្រូវបានចាប់ផ្តើម បន្ទាប់ពីកុមារប្រហែល៤០០នាក់បានធ្លាក់ខ្លួនឈឺក្រោយពីបានទទួលទានអាហារនៅសាលារៀនដោយឥតគិតថ្លៃនៅក្នុងខេត្ត Bengkulu ភាគខាងលិចប្រទេសឥណ្ឌូនេស៊ី ជាករណីដ៏អាក្រក់បំផុតនៃការពុលអាហារទាក់ទងនឹងកម្មវិធីផ្តល់អាហារដ៏ពេញនិយមរបស់លោកប្រធានាធិបតី Prabowo Subianto ដើម្បីជួយកុមារនិងស្ត្រីមានផ្ទៃពោះ។

សេចក្តីរាយការណ៍ពីការធ្លាក់ខ្លួនឈឺជាច្រើននាក់នៅថ្ងៃពុធនេះ បានកើតឡើងក្នុងពេលដែលប្រធានាធិបតី លោក Prabowo បានទៅដល់ទីក្រុងប៉េកាំង ប្រទេសចិន ដើម្បីចូលរួមព្រឹត្តិការណ៍រំលឹកដល់ការបញ្ចប់សង្គ្រាមលោកលើកទី២ និងប៉ុន្មានថ្ងៃបន្ទាប់ពីការតវ៉ាប្រឆាំងរដ្ឋាភិបាលរាលដាលដែលបានធ្វើឲ្យកក្រើកទីក្រុងនិងទីប្រជុំជននានានៅទូទាំងប្រទេសឥណ្ឌូនេស៊ី។

អភិបាលរងខេត្ត Bengkulu លោក Mian បាននិយាយថា អាជ្ញាធរនឹងបើកការស៊ើបអង្កេតលើមូលហេតុនៃការពុលនេះ។ លោក និយាយថា «យើងនឹងផ្អាកប្រតិបត្តិការជាបណ្តោះអាសន្ននៅផ្ទះបាយ ខណៈយើងស៊ើបអង្កេត»។

លោក Dadan Hindayana ប្រធានទីភ្នាក់ងារអាហារូបត្ថម្ភជាតិ ដែលគ្រប់គ្រងកម្មវិធីនេះ បាននិយាយថា ផ្ទះបាយដែលមានបញ្ហាទើបតែបានចាប់ផ្តើមដំណើរការនាពេលថ្មីៗនេះ ដោយសុំឱ្យបុគ្គលិកវាយតម្លៃសេវាកម្ម ខណៈកំពុងរង់ចាំលទ្ធផលនៃការធ្វើតេស្តលើអាហារ។