នៅថ្ងៃពុធ ទី៣ ខែកញ្ញា ឆ្នាំ២០២៥ នេះ ទីក្រុងប៉េកាំងបានបង្កើតឲ្យមាននូវទស្សនីយភាពដ៏អស្ចារ្យ និងអធិកអធម នៅឯការដើរព្យុហយាត្រាដ៏ធំដែលបង្ហាញពីគ្រឿងយុទ្ធោបករណ៍ចុងក្រោយបង្អស់របស់ប្រទេសចិន ជាព្រឹត្តិការណ៍ដែលត្រូវបានទស្សនាដោយបណ្ដាមេដឹកនាំពិភពលោក ក្នុងនោះមានរួមទាំងលោក Kim Jong Un របស់កូរ៉េខាងជើង និងលោក Vladimir Putin របស់រុស្ស៊ីផងដែរ។

សាធារណជនបានប្រមូលផ្តុំគ្នាតាំងពីព្រលឹមស្រាងៗ នៅទីលានធានអានមេន (Tiananmen Square) របស់រដ្ឋធានីនេះ ដែលជាច្រកចូលនៃវិមានប្រវត្តិសាស្ត្រ Forbidden City និងជាចំណុចផ្តោតសំខាន់នៃការបង្ហាញកម្លាំងរបស់លោកប្រធានាធិបតី Xi Jinping ទៅកាន់ពិភពលោក។

ភ្ញៀវទាំងអស់បាននាំគ្នាញញឹមពព្រាយ ដើម្បីថតរូបជាមួយនឹងសំបុត្រអញ្ជើញព្យុហយាត្រានៅឆាកខាងក្រោយនៃទីលានធានអានមេន ដែលត្រូវបានតុបតែងដោយទង់ជាតិរបស់ប្រទេសចិន និងកៅអីពណ៌ក្រហម និងបៃតងរាប់ពាន់ដែលត្រូវបានរៀបចំ សម្រាប់ឱកាសនេះ។ លេខពណ៌មាសដ៏ធំ «1945» និង «2025» ត្រូវបានដំឡើងនៅលើទីលាននេះ ដែលជាការរំលឹកពីរយៈពេលកន្លងផុតទៅ ៨០ឆ្នាំ គិតចាប់តាំងពីចុងបញ្ចប់នៃសង្គ្រាមលោកលើកទី២។

នាង Jenny Wang ជាមន្ត្រីរាជការអាយុ ២៤ឆ្នាំ បាននិយាយថា៖ «នេះជាលើកដំបូងដែលខ្ញុំចូលរួមក្នុងព្រឹត្តិការណ៍ព្យុហយាត្រាយោធា។ វាពិតជាអស្ចារ្យណាស់ដែលបានមកទីនេះ»។ អ្នកនាងបានបន្ថែមថា៖ «វាមានសារៈសំខាន់ណាស់ ក្នុងការរំលឹកដល់ការបញ្ចប់សង្រ្គាមនេះ និងដើម្បីធានាថា មនុស្សកាន់តែច្រើន នៅជុំវិញពិភពលោក បានរៀនសូត្រ អំពីជម្លោះនេះ និងការឈឺចាប់ដែលជនជាតិចិន បានជួបប្រទះនៅពេលនោះ»។

អ្នកដើរក្បួនបានគ្រវីទង់ជាតិចិនប្រកបដោយក្ដីរំភើប ខណៈក្រុមចម្រៀងដ៏ច្រើន បានច្រៀងបទស្នេហាជាតិ ប្រឆាំងនឹងជប៉ុន ដោយលើកកណ្តាប់ដៃឡើងទៅលើ។ ក្រុមយោធាបានផ្លុំត្រែយ៉ាងស្រុះគ្នា ខណៈទាហានដើរក្បួននៅលើទីលាន។ ចំណែកលោក Xi នៅក្នុងឈុតដែលមិនធ្លាប់បានឃើញពីមុន ត្រូវបានគេថតបានចាប់ដៃ និងជជែកជាមួយលោក Kim និងលោក Putin នៅពេលពួកលោកដើរទៅថតរូបរួមជាមួយបណ្ដាមេដឹកនាំបរទេសដទៃទៀត៕