ក្រុមមន្ត្រីបានប្រាប់ឲ្យដឹងថា ទឹកជំនន់បានកើតមាននៅផ្នែកជាច្រើននៅភាគខាងជើងនៃប្រទេសឥណ្ឌា ដោយចេញការព្យាករ អំពីព្យុះផ្គររន្ទះបន្ថែមទៀត សម្រាប់ថ្ងៃពុធ (ទី៣ ខែកញ្ញា) នេះ ខណៈដែលប្រព័ន្ធផ្សព្វផ្សាយ ក្នុងស្រុកបានរាយការណ៍ថា មនុស្ស ១០.០០០នាក់ ត្រូវបានជម្លៀសចេញពីច្រាំងទន្លេ ក្នុងរដ្ឋធានីដេលី។

ភ្លៀងធ្លាក់ នៅរដូវមូសុង ក្នុងប្រទេសឥណ្ឌា មានសភាពខ្លាំងជាពិសេសក្នុងឆ្នាំ២០២៥ នេះ ដោយបានសម្លាប់មនុស្សយ៉ាងហោចណាស់ ១៣០នាក់ ក្នុងខែសីហាតែមួយគត់ នៅភាគខាងជើងប្រទេសឥណ្ឌា ខណៈដែលបំផ្លិចបំផ្លាញភូមិ និងផ្ដល់ការខូចខាតដល់ហេដ្ឋារចនាសម្ព័ន្ធ។

ទឹកជំនន់ជុំចុងក្រោយ បានវាយប្រហារភាគខាងជើងតំបន់ Jammu និង Kashmir រដ្ឋ Himachal Pradesh រដ្ឋ Uttarakhand និងខេត្ត Punjab ជាកន្លែងដែលទឹកទន្លេ Chenab និង Tawi បានហក់ឡើងលើសពីកម្រិតគ្រោះថ្នាក់នៅកន្លែងជាច្រើន។

ទឹកទន្លេដែលឡើងកាន់តែខ្លាំង បានបង្កឲ្យមានការរបំណាក់ដី និងខូចខាតផ្លូវថ្នល់ជាច្រើន ដោយកាត់ផ្តាច់ផ្នែកខ្លះនៃតំបន់ភ្នំ Jammu និង Himachal ពីតំបន់នៃប្រទេសឥណ្ឌាផ្សេងទៀត។ នាយកដ្ឋានឧតុនិយមរបស់ប្រទេសឥណ្ឌា បានព្រមានពីភ្លៀងធ្លាក់ខ្លាំង រហូតដល់កាន់តែខ្លាំងឡើង នៅក្នុងតំបន់ Jammu និង Kashmir នៅថ្ងៃទី៣ ខែកញ្ញានេះ ដោយភ្លៀងធ្លាក់ខ្លាំងបន្ថែមទៀតត្រូវបានរំពឹងមាននៅរដ្ឋ Uttarakhand និង Uttar Pradesh។

គណៈកម្មការទឹកកណ្តាល បានឲ្យដឹងថា ទឹកទន្លេ Yamuna ឡើងកាន់តែខ្លាំង លើសពីកម្រិតគ្រោះថ្នាក់ កាលពីថ្ងៃទី២ ខែកញ្ញា នៅទីក្រុងដេលី។ ហើយប្រព័ន្ធផ្សព្វផ្សាយក្នុងស្រុកបានរាយការណ៍ថា មនុស្សជិត ១០.០០០នាក់ត្រូវបានជម្លៀសទៅកាន់ជំរុំសង្គ្រោះដែលបង្កើតឡើងដោយរដ្ឋាភិបាល នៅតាមបណ្តោយផ្លូវធំជាវិធានការប្រុងប្រយ័ត្នសម្រាប់អ្នកដែលរស់នៅក្នុងតំបន់ទំនាប៕