សិស្សនិស្សិតនិងគ្រូបង្រៀនរាប់ពាន់នាក់ ត្រូវបានសម្លាប់ ឬរងរបួស នៅក្នុងតំបន់ហ្កាហ្សា និងវេសបែង   ( West Bank) ចាប់តាំងពីការចាប់ផ្តើមនៃការវាយលុករបស់យោធាអ៊ីស្រាអែល បន្ទាប់ពីការវាយប្រហារកាលពីថ្ងៃទី ០៧ ខែតុលា ចំពេលមានការបំផ្លិចបំផ្លាញយ៉ាងធ្ងន់ធ្ងរនូវសាលារៀន និងសាកលវិទ្យាល័យ។

តួលេខដែលបានចេញផ្សាយកាលពីថ្ងៃអង្គារដោយក្រសួងអប់រំនិងឧត្តមសិក្សាប៉ាឡេស្ទីន បង្ហាញពីទំហំនៃការបំផ្លិចបំផ្លាញដល់វិស័យអប់រំ នៅក្នុងតំបន់ទាំងនេះ៖ សិស្សនិស្សិត ១៨.៦៥១នាក់ ត្រូវបានសម្លាប់ និង ២៩.១១៤នាក់ បានរងរបួស ភាគច្រើននៃពួកគេនៅតំបន់ហ្កាហ្សាដែលមានជាង ១៨.៥០៨នាក់ បានស្លាប់ និង ២៨.១៤២នាក់ បានរងរបួស។ នៅតំបន់វេសបែង ចំនួនអ្នកស្លាប់ក្នុងចំណោមសិស្សនិស្សិតមានចំនួន ១៤៣នាក់  ៩៧២ នាក់ បានរងរបួស និង ៧៩២ នាក់ ត្រូវបានចាប់ឃុំខ្លួន។

ក្រសួងក៏បានកត់ត្រាការស្លាប់របស់គ្រូបង្រៀន និងអ្នកគ្រប់គ្រងចំនួន ៩៧២នាក់ និង របួសចំនួន ៤.៥៣៨នាក់ផងដែរ។ លើសពីនេះទៀត ១៩៩នាក់ ត្រូវបានឃុំខ្លួន នៅតំបន់វេសបែង។

ទីភ្នាក់ងារសារព័ត៌មាន Wafa របស់ប៉ាឡេស្ទីន បានរាយការណ៍ថា ការខូចខាតហេដ្ឋារចនាសម្ព័ន្ធនៅតំបន់ហ្កាហ្សា មានសភាពធ្ងន់ធ្ងរ ដោយសាលារៀនរដ្ឋាភិបាលចំនួន ១៧២ និងអគារសាកលវិទ្យាល័យចំនួន ៦៣ ត្រូវបានបំផ្លាញទាំងស្រុង។ សាលារៀនរដ្ឋ ចំនួន ១១៨ និងសាលារៀនជាង ១០០ផ្សេងទៀត ដំណើរការដោយទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីននៅតំបន់ដើមបូព៌ា ត្រូវរងការទម្លាក់គ្រាប់បែក ឬបំផ្លិចបំផ្លាញ ហើយសាលារៀនចំនួន ២៥ ត្រូវបានដកចេញទាំងស្រុងពីបញ្ជីអប់រំ។ នៅតំបន់វេសបែង សាលារៀនចំនួន ១៥២ ត្រូវបានបំផ្លិចបំផ្លាញ ហើយសាកលវិទ្យាល័យ និងមហាវិទ្យាល័យចំនួន ៨ បានវាយប្រហារ ម្តងហើយម្តងទៀត៕