ក្រុមមេធាវី បាននិយាយកាលពីថ្ងៃអង្គារថា អាជ្ញាធរតុលាការបារាំង បានចេញដីកាចាប់ខ្លួនប្រធានាធិបតីស៊ីរីដែលត្រូវគេបណ្តេញចេញពីអំណាច លោក បាសា អាល់អាសាដ ( Bashar al-Assad) និងអតីត   មន្ត្រីជាន់ខ្ពស់ចំនួន ៦រូបទៀត ជុំវិញការទម្លាក់គ្រាប់បែកលើទីក្រុងដែលកាន់កាប់ដោយក្រុមឧទ្ទាម កាលពីឆ្នាំ ២០១២ ដែលបានបណ្តាលឲ្យអ្នកកាសែតពីរនាក់ស្លាប់។

លោក Marie Colvin អាយុ ៥៦ឆ្នាំ ជាជនជាតិអាមេរិក ដែលធ្វើការឲ្យសារព័ត៌មាន The Sunday Times of Britain និងអ្នកថតរូបជនជាតិបារាំងលោក Remi Ochlik អាយុ ២៨ឆ្នាំ ត្រូវបានសម្លាប់ នៅថ្ងៃទី ២២ ខែកុម្ភៈឆ្នាំ ២០១២ ដោយការផ្ទុះនៅទីក្រុង Homs ភាគខាងកើត ដែលកំពុងត្រូវបានស៊ើបអង្កេតដោយតុលាការបារាំងថា ជាឧក្រិដ្ឋកម្មដ៏មានសក្តានុពលប្រឆាំងនឹងមនុស្សជាតិក៏ដូចជាឧក្រិដ្ឋកម្មសង្គ្រាមផង ដែរ។

អ្នកថតរូបជនជាតិអង់គ្លេសលោក Paul Conroy អ្នកយកព័ត៌មានបារាំងអ្នកស្រី Edith Bouvier និងអ្នកបកប្រែស៊ីរីលោក Wael Omar បានរងរបួស ក្នុងការវាយប្រហារលើមជ្ឈមណ្ឌលសារព័ត៌មានក្រៅផ្លូវការដែលពួកគេ កំពុងធ្វើការ។

លោក អាសាដ បានរត់គេចខ្លួនជាមួយក្រុមគ្រួសាររបស់លោក ទៅកាន់ប្រទេសរុស្ស៊ី បន្ទាប់ពីត្រូវបាន    បណ្តេញចេញពីអំណាច នៅចុងឆ្នាំ ២០២៤ ទោះបីជាកន្លែងលាក់ខ្លួនច្បាស់លាស់របស់លោក មិនត្រូវបានបញ្ជាក់ក៏ដោយ។

ក្រៅពីលោក អាសាដ ដីកាចាប់ខ្លួននោះ ត្រូវបានកំណត់គោលដៅជាពិសេសលើប្អូនប្រុសរបស់លោក គឺលោក Maher Assad ដែលជាប្រធានកងពលរថពាសដែកស៊ីរីលេខ៤ នៅពេលនោះ ប្រធានចារកម្មលោក Ali Mamlouk និងលោក Ali Ayoub ដែលជាអតីតនាយសេនាធិការកងទ័ព៕