ទីភ្នាក់ងារសារព័ត៌មាន AFP រាយការណ៍ដោយដកស្រង់សម្តីពីវិមាន Elysee ថា បណ្តាប្រទេសនៅអឺរ៉ុបដែលគាំទ្ររបបទីក្រុងគីវ បានព្រាងសំណើសម្រាប់ការធានាសន្តិសុខក្រោយជម្លោះសម្រាប់អ៊ុយក្រែន ហើយកំពុងរង់ចាំការគាំទ្រពីសហរដ្ឋអាមេរិក។

ទីភ្នាក់ងារនេះ បានដកស្រង់សម្តីទីប្រឹក្សារបស់ប្រធានាធិបតីបារាំងម្នាក់ ដែលបាននិយាយនៅក្នុងសន្និសីទ មួយថា៖«អ្វីដែលយើងនឹងស្វែងរកនៅថ្ងៃព្រហស្បតិ៍ គឺជាការបញ្ជាក់ថា «សម្ព័ន្ធនៃឆន្ទៈ» ពិតជាមានការគាំទ្រពីសហរដ្ឋអាមេរិក»។

នៅថ្ងៃទី ០៤ ខែកញ្ញា កិច្ចប្រជុំនៃអ្វីដែលហៅថា សម្ព័ន្ធនៃឆន្ទៈ គ្រោងនឹងប្រព្រឹត្តទៅ នៅទីក្រុងប៉ារីសដោយផ្តោតលើការធានាសន្តិសុខសម្រាប់អ៊ុយក្រែន។ ក្រៅពីមេដឹកនាំបារាំង អង់គ្លេស និងអាល្លឺម៉ង់ លោក វ្ល៉ូឌីមី ហ្សេឡិនស្គី ក៏នឹងមានវត្តមានដែរ។

ចំនួនពិតប្រាកដនៃអ្នកចូលរួម មិនទាន់ដឹងនៅឡើយទេ ប៉ុន្តែប្រធានាធិបតីបារាំងលោក អេម៉ានុយអែល ម៉ាក្រុង (Emmanuel Macron) បាននិយាយពីមុនថា សម្ព័ន្ធនេះ មានប្រទេសសមាជិកចំនួន ៣០ រួចហើយ។

ក្នុងបទសម្ភាសន៍ជាមួយសារព័ត៌មាន NBC News រដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ (Sergey Lavrov) បាននិយាយថា បញ្ហានៃការធានាសន្តិសុខជុំវិញដំណោះស្រាយអ៊ុយក្រែន គួរតែត្រូវបានដោះស្រាយដោយការឯកភាពគ្នា ដោយគិតគូរពីផលប្រយោជន៍ជាមូលដ្ឋានរបស់រុស្ស៊ី។ លោកក៏បានគូសបញ្ជាក់ផងដែរថា ការផ្តល់ការធានាសន្តិសុខសម្រាប់អ៊ុយក្រែន តាមរយៈអន្តរាគមន៍យោធាបរទេស នៅក្នុងផ្នែកណាមួយនៃទឹកដីអ៊ុយក្រែន នឹងមិនអាចទទួលយកបានទេសម្រាប់រុស្ស៊ី៕