ប្រធានាធិបតីរុស្ស៊ី លោក វ្ល៉ាឌីមៀ ពូទីន បានថ្លែងអំណរគុណដល់មេដឹកនាំកូរ៉េខាងជើង លោក គីម ជុង   អ៊ុន ចំពោះភាពក្លាហានរបស់ទាហានរបស់លោក ដែលបានប្រយុទ្ធនៅអ៊ុយក្រែន នៅខាងភាគីរុស្ស៊ី។

ជាការឆ្លើយតប លោក គីម បាននិយាយថា ខ្ញុំមានឆន្ទៈធ្វើ «អ្វីគ្រប់យ៉ាងដែលខ្ញុំអាចធ្វើបាន ដើម្បីជួយ» ប្រទេសរុស្ស៊ី។

មេដឹកនាំទាំងពីរ បានជួបគ្នាក្នុងទីក្រុងប៉េកាំង នៅថ្ងៃពុធនេះ ខណៈដែលប្រទេសចិន បានប្រារព្ធពិធីព្យុហយាត្រាយោធាដ៏ធំបំផុតរបស់ខ្លួន ដែលមិនធ្លាប់មាន ដែលជាខួប ៨០ឆ្នាំ ចាប់តាំងពីការបញ្ចប់សង្គ្រាមលោកលើកទី២ នៅទ្វីបអាស៊ី។

លោក ពូទីន ដែលបានចាប់ផ្តើមការលុកលុយពេញបន្ទុកនៅប្រទេសអ៊ុយក្រែន ក្នុងខែកុម្ភៈ ឆ្នាំ ២០២២ បាននិយាយថា ទំនាក់ទំនងទ្វេភាគីរវាងរុស្ស៊ី និងកូរ៉េខាងជើង គឺជាមិត្តភាព ហើយថា យោធារបស់ទីក្រុងព្យុងយ៉ាង បានជួយរំដោះតំបន់ Kursk ពីកងទ័ពអ៊ុយក្រែន។

លោក ពូទីន បានប្រាប់លោក គីម ជុងអ៊ុន ក្នុងអំឡុងកិច្ចពិភាក្សានៅថ្ងៃពុធនេះថា៖«ទាហានរបស់លោក បានប្រយុទ្ធយ៉ាងអង់អាចក្លាហាន និងប្រកបដោយវីរភាព»។

«ខ្ញុំសូមកត់សម្គាល់ថា យើងនឹងមិនភ្លេចនូវការលះបង់ ដែលកងកម្លាំងប្រដាប់អាវុធ និងក្រុមគ្រួសារទាហានរបស់លោក ដែលបានធ្វើនោះឡើយ»។

លោក គីម ជុងអ៊ុន ក៏បានសម្តែងការដឹងគុណដល់ការទទួលស្គាល់របស់មេដឹកនាំរុស្ស៊ី ចំពោះកងទ័ពកូរ៉េខាងជើង ហើយបាននិយាយថា ទំនាក់ទំនងទ្វេភាគីរវាងប្រទេសទាំងពីរ បាននិងកំពុង «រីកចម្រើនលើគ្រប់វិស័យ» ដែលសំដៅលើការចូលរួមរបស់ទីក្រុងព្យុងយ៉ាងក្នុង «ការតស៊ូរួមគ្នា» ជាមួយរុស្ស៊ី នៅអ៊ុយក្រែន៕