នៅថ្ងៃពុធ (ទី៣ ខែកញ្ញា) នេះ ក្តីសង្ឃឹមកាន់តែរសាត់បាត់ទៅ ក្នុងការស្វែងរកអ្នកនៅរស់រានមានជីវិតពីគំនរបាក់បែកនៃផ្ទះសម្បែងដែលត្រូវបានបំផ្លិចបំផ្លាញដោយគ្រោះរញ្ជួយដីដ៏ខ្លាំង កាលពីចុងសប្តាហ៍នៅភាគខាងកើតប្រទេសអាហ្វហ្គានីស្ថាន ខណៈដែលសេវាសង្គ្រោះបន្ទាន់ពិបាកចូលទៅដល់ភូមិដាច់ស្រយាល។

រញ្ជួយដីកម្រិត ៦,០រ៉ិចទ័រ បានវាយប្រហារតំបន់ភ្នំជាប់ព្រំដែនប្រទេសប៉ាគីស្ថាន កាលពីថ្ងៃអាទិត្យចុងសប្ដាហ៍កន្លងមក ដោយបានធ្វើឲ្យអ្នកស្រុកត្រូវនាំគ្នាមកនៅទីហាលវាល ព្រោះតែភ័យខ្លាចពីការមានរលករញ្ជួយខ្លាំងក្លាទៀត និងព្យាយាមជួយទាញមនុស្សចេញពីក្រោមអគារបាក់រលំ។

អាជ្ញាធរតាលីបង់បានឲ្យដឹងថា គ្រោះរញ្ជួយដីបានឆក់យកជីវិតមនុស្សជាង ១.៤០០នាក់យ៉ាងតិច និងបណ្ដាលឲ្យរបួសជាង ៣.៣០០នាក់ ដែលធ្វើឲ្យវាក្លាយជាឧប្បត្តិហេតុធម្មជាតិដ៏អាក្រក់បំផុត ក្នុងរយៈពេលជាច្រើនទសវត្សរ៍ដែលបានវាយប្រហារប្រទេសក្រីក្រមួយនេះ។

ភាគច្រើននៃអ្នកស្លាប់ គឺនៅក្នុងខេត្ត Kunar ខណៈមានអ្នកស្លាប់រាប់សិបនាក់ និងរាប់រយនាក់បានរងរបួស នៅក្នុងខេត្តជិតខាង Nangarhar និង Laghman។

មន្ត្រីក្នុងតំបន់ លោក Ijaz Ulhaq Yaad បានប្រាប់សារព័ត៌មាននៅថ្ងៃពុធនេះថា នៅក្នុងតំបន់ Nurgal នៃខេត្ត Kunar ជនរងគ្រោះនៅតែជាប់នៅក្រោមគំនរបាក់បែក ហើយពិបាកក្នុងការជួយសង្គ្រោះ។ លោកបានប្រាប់ថា៖ «មានភូមិមួយចំនួនមិនទាន់បានទទួលជំនួយនៅឡើយទេ»។

បំណាក់ដីដែលបណ្តាលមកពីរញ្ជួយដីនេះ បានកា្លយជាឧបសគ្គដល់ការចូលទៅកាន់ភូមិដាច់ស្រយាលរួចទៅហើយ។ ក្រុមអង្គការមិនមែនរដ្ឋាភិបាល Save the Children បានឲ្យដឹងថា ក្រុមជំនួយមួយរបស់ស្ថាប័នទាំងនោះ «ត្រូវដើរចម្ងាយ ២០គីឡូម៉ែត្រ ដើម្បីទៅដល់ភូមិដែលត្រូវបានកាត់ផ្តាច់ដោយការធ្លាក់ថ្ម ដោយស្ពាយឧបករណ៍ពេទ្យនៅលើខ្នងរបស់ពួកគេ ដោយមានជំនួយពីសមាជិកនៅសហគមន៍»។ អង្គការសុខភាពពិភពលោក បានព្រមានថា ចំនួនអ្នកស្លាប់ដោយសារគ្រោះរញ្ជួយដីនេះ ត្រូវបានគេរំពឹងថា នឹងកើនឡើង «ដោយសារមនុស្សជាច្រើននៅតែជាប់ក្នុងអគារដែលរងការបំផ្លិចបំផ្លាញ»៕