ប្រធានាធិបតីអាមេរិក លោក Donald Trump នឹងស្វាគមន៍ប្រធានាធិបតីប៉ូឡូញ លោក Karol Nawrocki ដែលធ្វើដំណើរត្រលប់ទៅកាន់សេតវិមានជាថ្មី នៅថ្ងៃពុធ (ទី៣ ខែកញ្ញា) នេះ បន្ទាប់ពីបានគាំទ្រអ្នកជាតិនិយមអភិរក្សនិយម នៅក្នុងការបោះឆ្នោតរបស់ប្រទេសប៉ូឡូញ ដោយកិច្ចប្រជុំរបស់ពួកលោក ទំនងជាផ្តោតលើសង្គ្រាមរបស់រុស្ស៊ី នៅអ៊ុយក្រែន និងសន្តិសុខថាមពល។

លោក Trump បានធ្វើការអញ្ជើញជាផ្លូវការ ពោលគឺប៉ុន្មានថ្ងៃបន្ទាប់ពីលោក Nawrocki បានស្បថចូលកាន់តំណែង កាលពីដើមខែសីហា ហើយបន្ទាប់មកបានធ្វើអន្តរាគមន៍ ដើម្បីធានាថា ប្រធានាធីបតីប៉ូឡូញបានចូលរួមក្នុងការជជែកតាមទូរសព្ទដ៏សំខាន់មួយ ស្តីពីអ៊ុយក្រែន ជាមួយបណ្ដាមេដឹកនាំអឺរ៉ុប ជំនួសឲ្យគូប្រជែងរបស់លោក គឺនាយករដ្ឋមន្ត្រីប៉ូឡូញ លោក Donald Tusk ដែលជាអ្នកប្រកាន់កណ្តាលនិយម។

លោកប្រធានាធិបតីអាមេរិក បានធ្វើជាម្ចាស់ផ្ទះស្វាគមន៍លោក Nawrocki នៅសេតវិមាន កាលពីខែឧសភា ដោយបង្ហាញការគាំទ្រដល់រូបលោកនៅក្នុងគ្រាដ៏សំខាន់ អំឡុងការបោះឆ្នោតរបស់ប៉ូឡូញ។ លោក Nawrocki បានមានជ័យជម្នះលើបេក្ខជននៃគណបក្សគាំទ្រអឺរ៉ុប ដែលជាគណបក្សកណ្តាលនិយមរបស់លោក Tusk នៅមួយខែក្រោយមក។

កិច្ចពិភាក្សា នៅថ្ងៃពុធនេះ ត្រូវបានគេរំពឹងថា នឹងផ្តោតលើការចរចាដែលជាប់គាំង ដើម្បីបញ្ចប់សង្រ្គាម និងការព្រួយបារម្ភផ្នែកសន្តិសុខរបស់ប្រទេសប៉ូឡូញ ចំពេលមានសញ្ញាបង្ហាញថា លោក Trump មានការខកចិត្ត ចំពោះប្រធានាធិបតីរុស្ស៊ី លោក Vladimir Putin ដែលមិនអាចឆ្ពោះទៅមុខ ក្នុងការបញ្ចប់សង្រ្គាម៕