ភ្នំពេញ៖ ក្រសួងពាណិជ្ជកម្ម កំពុងជំរុញក្រុមការងារធ្វើការពិនិត្យ និងកែសម្រួលខ្លឹមសារមួយចំនួននៃសេចក្តីព្រាង គោលនយោបាយជាតិស្តីពីស្វាយចន្ទី ដើម្បីត្រៀមស្នើសុំការសម្រេចពីរដ្ឋាភិបាល សម្រាប់យកមកប្រើប្រាស់។
កិច្ចប្រជុំដើម្បីពិនិត្យ និងពិភាក្សាលើសេចក្តីព្រាងគោលនយោបាយជាតិស្តីពីស្វាយចន្ទី ត្រូវបានធ្វើឡើងសប្តាហ៍មុន ដឹកនាំដោយ ឯកឧត្តម រាជ រ៉ា រដ្ឋលេខាធិការក្រសួងពាណិជ្ជកម្ម។
កិច្ចប្រជុំ ឯកឧត្តម រាជ រ៉ា បានលើកឡើងអំពីគោលនយោបាយជាតិស្តីពីស្វាយចន្ទី ដែលកន្លងមកគោលនយោបាយនេះបានដាក់ឆ្លងកិច្ចប្រជុំជាច្រើនលើករួចមកហើយ ដូចជា កិច្ចប្រជុំកម្រិតអគ្គនាយកដ្ឋាន-អន្តរអគ្គនាយកដ្ឋាន កិច្ចប្រជុំក្រុមការងារបច្ចេកទេស និងកិច្ចប្រជុំក្រុមការងារចម្រុះរៀបចំគោលនយោបាយស្វាយចន្ទីកម្ពុជា។
ក្រុមការងាររបស់ក្រសួង បានបញ្ចូលនូវធាតុចូលពីអន្តរក្រសួង-ស្ថាប័ន ដៃគូអភិវឌ្ឍន៍ និងវិស័យឯកជនពាក់ព័ន្ធដូចជា សមាគម អ្នកនាំចេញ អ្នកដាំដុះ ដើម្បីបំពេញបន្ថែមនូវរាល់ចំណុចខ្វះខាត។
ឯកឧត្តម រាជ រ៉ា លើកឡើងថា ស្វាយចន្ទី គឺជាទំនិញមានសក្ដានុពលដែលកម្ពុជាមានទាំងការដាំដុះ និងការផ្គត់ផ្គង់លើទីផ្សារក្នុងស្រុក និងនាំចេញ។
ឯកឧត្តម រាជ រ៉ា បន្តថា ការរៀបចំឱ្យមាននយោបាយជាតិនឹងរួមចំណែកយ៉ាងច្រើនដល់ការសម្រេចបាននូវមហិច្ឆតាពេលអនាគតរបស់កម្ពុជាក្នុងការក្លាយជាប្រទេសផលិត និងនាំចេញ។
ជាលទ្ធផល អង្គប្រជុំបានបើកកិច្ចពិភាក្សាពិនិត្យកែសម្រួល និងបន្ថែមខ្លឹមសារនៅលើចំណុចសំខាន់ និងទិន្នន័យមួយចំនួននៃគោលនយោបាយនេះ ដោយរក្សានូវអត្ថន័យដើម។
ទិន្នន័យក្រសួងកសិកម្មរុក្ខាប្រមាញ់ និងនេសាទ បង្ហាញថា ក្នុងឆ្នាំ២០២១ កម្ពុជានាំចេញគ្រាប់ស្វាយចន្ទីចំនួន ៩៣៧ ៩៧៤,២៦តោន តោនកើនឡើង ៣២៨,៣៤ ភាគរយពីចំនួន ២១៨ ៩៨១តោនក្នុងឆ្នាំ២០២០។ គ្រាប់ស្វាយចន្ទីត្រូវបាននាំចេញភាគច្រើនទៅប្រទេស វៀតណាម ចិន ថៃ ឥណ្ឌា ជប៉ុន និងកូរ៉េ ជាដើម៕អត្ថបទ៖ វណ្ណៈ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
