ប្រធានសភាថៃ លោក Wan Muhammad Noor Matha នៅថ្ងៃពុធ (ទី៣ ខែកញ្ញា) នេះ បានទទួលយកញត្តិពីគណបក្ស Bhumjaithai (ភូមិចៃថៃ) ដែលស្នើឲ្យលោកបញ្ចូលការបោះឆ្នោតជ្រើសរើសនាយករដ្ឋមន្ត្រីទៅក្នុងរបៀបវារៈរបស់សភា នៅក្នុងកិច្ចប្រជុំបន្ទាប់។

អគ្គលេខាធិការបក្ស Bhumjaithai លោក Chaichanok Chidchob បានដឹកនាំសមាជិកសភាមួយក្រុមមកពីគណបក្សរបស់លោក ដើម្បីយកញត្តិដាក់ជូនលោក Wan Noor នៅសភា។ ការវិវត្តចុងក្រោយនេះកំពុងកើតឡើង បន្ទាប់ពីមេដឹកនាំគណបក្សភូមិ Bhumjaithai លោក Anutin Charnveerakul បានប្រកាសពីការបង្កើតរដ្ឋាភិបាលសំឡេងភាគតិចដែលមាន ១៤៦អាសនៈ។

លោក Wan Noor បានសន្យាថា នឹងដាក់ការបោះឆ្នោតជ្រើសរើសនាយករដ្ឋមន្ត្រីនៅក្នុងរបៀបវារៈរបស់សភាឲ្យបានឆាប់តាមដែលអាចធ្វើទៅបាន ប្រសិនបើដំណើរការនេះមិនបំពានរដ្ឋធម្មនុញ្ញ ហើយភាគីទាំងអស់ បានត្រៀមខ្លួនរួចជាស្រេច ដើម្បីចូលរួមក្នុងការបោះឆ្នោត។

លោក Wan Noor បានប្រាប់លោក Chaichanok និងសមាជិកសភារបស់គណបក្ស Bhumjaithai ថា៖ «វាជារឿងបន្ទាន់ដែលប្រទេសមិនមាននាយករដ្ឋមន្ត្រី ដូច្នេះ យើងត្រូវតែអនុវត្តការបោះឆ្នោតជ្រើសរើសនាយករដ្ឋមន្ត្រីឲ្យបានឆាប់តាមដែលអាចធ្វើទៅបាន ប៉ុន្តែដំណើរការត្រូវតែអនុវត្តតាមច្បាប់រដ្ឋធម្មនុញ្ញ និងអាស្រ័យលើការត្រៀមខ្លួនរបស់ភាគីទាំងអស់ សម្រាប់ការបោះឆ្នោត»។

តែយ៉ាងណាក្ដី ដំណើរការបោះឆ្នោតជ្រើសរើសនាយករដ្ឋមន្ត្រីនេះ អាចនឹងមិនកើតឡើងនោះឡើយ ដោយសារនាយករដ្ឋមន្ត្រីចាំផ្ទះ លោក Phumtham Wechayachai បានប្រកាសនៅព្រឹកថ្ងៃពុធនេះថា លោកបានបញ្ជូនសេចក្តីព្រាងព្រះរាជក្រឹត្យ សម្រាប់ដំណើរការរំលាយសភា ដោយទូលសុំព្រះរាជក្រឹត្យ តាំងពីល្ងាចថ្ងៃអង្គារ។

ប្រសិនបើព្រះមហាក្សត្រទ្រង់ឡាយព្រះហស្តលេខាលើព្រះរាជក្រឹត្យនោះ អាណត្តិរបស់សភានឹងបញ្ចប់ភ្លាមៗ ដោយការបោះឆ្នោតជ្រើសរើសនាយករដ្ឋមន្ត្រីដែលកំពុងរង់ចាំនេះ លែងមានដំណើរការតែម្ដង៕