ប្រទេសអេមីរ៉ាតអារ៉ាប់រួម (អារ៉ាប់រួម) នៅថ្ងៃពុធ (ទី3 ខែកញ្ញា) បានព្រមានអ៊ីស្រាអែលថា ការបញ្ចូលជាដែនដីឧបសម្ព័ន្ធណាមួយនៃតំបន់ West Bank នឹងបង្កើតបានជាបន្ទាត់ក្រហម សម្រាប់ទីក្រុង Abu Dhabi ដែលនឹងធ្វើឲ្យប៉ះពាល់យ៉ាងធ្ងន់ធ្ងរដល់ស្មារតីនៃកិច្ចព្រមព្រៀង Abraham ជាកតិកាសញ្ញាដែលធ្វើឲ្យមានប្រក្រតីភាពនូវទំនាក់ទំនង រវាងប្រទេសទាំង២។

លោកស្រី Lana Nusseibeh ជំនួយការរដ្ឋមន្ត្រីទទួលបន្ទុកកិច្ចការនយោបាយ និងជាបេសកជននៃរដ្ឋមន្ត្រីក្រសួងការបរទេសរបស់អារ៉ាប់រួម បានប្រាប់សារព័ត៌មានរ៉យទ័រថា៖ «តាំងពីដើមដំបូងមក យើងបានចាត់ទុកកិច្ចព្រមព្រៀងនេះជាមធ្យោបាយមួយ ដែលអាចបន្តការគាំទ្ររបស់យើង ចំពោះប្រជាជនប៉ាឡេស្ទីន និងសេចក្តីប្រាថ្នាស្របច្បាប់របស់ពួកគេ ក្នុងការកា្លយជារដ្ឋឯករាជ្យ។ នោះគឺជាជំហររបស់យើង ក្នុងឆ្នាំ២០២០ ហើយវានៅតែមានគោលជំហរនោះដដែលនៅថ្ងៃនេះ»។

ការអត្ថាធិប្បាយនេះគឺជាការរិះគន់ខ្លាំងបំផុតរបស់អារ៉ាប់រួម ចំពោះការប្រព្រឹត្តរបស់អ៊ីស្រាអែល គិតចាប់តាំងពីដើមដំបូងនៃសង្រ្គាម នៅតំបន់ហ្កាហ្សា ក្នុងឆ្នាំ២០២៣។

កាលពីខែសីហា រដ្ឋមន្ត្រីហិរញ្ញវត្ថុស្តាំនិយមជ្រុលរបស់អ៊ីស្រាអែល លោក Bezalel Smotrich បានប្រកាសថា ការងារនឹងចាប់ផ្តើមលើដំណើរការតាំងទីលំនៅដែលត្រូវបានពន្យារពេលយ៉ាងយូរ ដែលនឹងបែងចែកតំបន់ West Bank ហើយកាត់ផ្ដាច់វាចេញពីក្រុងហ្សេរុយសាឡឹមខាងកើត ជាចំណាត់ការដែលការិយាល័យរបស់លោកបានបញ្ជាក់ថា នឹង «លុបបំបាត់» គំនិតចង់មានរដ្ឋប៉ាឡេស្ទីន។

លោកស្រី Nusseibeh បានបញ្ជាក់ថា៖ «យើងអំពាវនាវឲ្យរដ្ឋាភិបាលអ៊ីស្រាអែលផ្អាកផែនការទាំងនេះ។ ក្រុមជ្រុលនិយម មិនថាបែបណាក៏ដោយ មិនអាចអនុញ្ញាតឲ្យកំណត់មាគ៌ារបស់តំបន់នេះបានទេ។ សន្តិភាពទាមទារឲ្យមានភាពក្លាហាន ការតស៊ូ និងការបដិសេធមិនឲ្យមានអំពើហិង្សាកំណត់ជម្រើសរបស់យើង»៕