ភ្នំពេញ៖ រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី២៤ ខែមករា ឆ្នាំ ២០២២នេះ បានចេញវីដេអូខ្លីមួយ ដោយថ្លែងអំណរគុណដល់ គ្រូបង្រៀននិងភាគីពាក់ព័ន្ធដែលចូលរួមក្នុងដំណើរការសិក្សាឆ្នាំសិក្សាថ្មីនេះ។
ឯកឧត្ដមរដ្ឋមន្ត្រី ក៏បានដាក់ចេញវិធានការ ៣ចំណុច សម្រាប់គ្រឹះស្ថានសិក្សាត្រូវអនុវត្តផងដែរ។ ការចេញវីដេអូនេះ ក៏ស្របពេលដែលមានករណី ឆ្លងវីរុសបំប្លែងថ្មី អូមីក្រុង ឆ្លងចូលសហគម និងថ្មីៗនេះ មានការឆ្លងចូលសាលារៀនបឋមសិក្សាព្រះនរោត្តម ដែលឈានដល់ការផ្អាកការសិក្សារយៈពេល២សប្ដាហ៍ផងដែរ។
ឯកឧត្ដម ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា នាថ្ងៃនេះ បានចេញវីដេអូ ដាក់ចេញនូវវិធានការ ៣ចំណុច តម្រូវឱ្យគ្រប់គ្រឹះស្ថានសិក្សាត្រូវអនុវត្តឱ្យបានខ្ជាប់ខ្ជួន សម្រាប់ពេលបច្ចុប្បន្ននេះ។
ការដាក់ចេញវិធានការ ទាំង៣ចំណុចនេះ រួមមាន ការបន្តអនុវត្តស្តង់ដារសុវត្ថិភាព ៣ការពារ ៣កុំ ការបង្កើតគណៈកម្មការសុខភាពសិក្សានៅតាមគ្រឹះស្ថានសិក្សា និងការរៀនតាមបណ្ដុំដោយកំណត់ចំនួនសិស្សមិនឱ្យលើសពីចំនួន ២០ទៅ ២៥នាក់នោះទេ។
ការដាក់ចេញវិធានការរបស់ រដ្ឋមន្ត្រីក្រសួងអប់រំ នាពេលនេះ ក៏ស្របពេលដែលកម្ពុជា មានករណីឆ្លងអូមីក្រុង ចូលក្នុងសហគម និងមានការឆ្លងចូលសាលារៀនផងដែរ។
ជាក់ស្ដែងសម្រាប់ ក្របខណ្ឌរាជធានីភ្នំពេញ តាមការបញ្ជាក់របស់លោក លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡារាជធានីភ្នំពេញ បញ្ជាក់ថា រាជធានីភ្នំពេញមានការផ្អាកការសិក្សានៅសាលាបឋមសិក្សា ព្រះនរោត្តម រយៈពេល២សប្ដាហ៍។ ការផ្អាកនេះ គឺដោយសារតែមានការរកឃើញករណីវិជ្ជមាន អូមីក្រុង កើតឡើងចំនួន ៥ករណី និងករណីវិជ្ជមាន កូវីដធម្មតា ចំនួន ២ករណី។ ប្រធានមន្ទីរអប់រំបន្ថែមថា ការឆ្លងនេះដើមហេតុ ក៏មិនមែនកើតឡើងនៅក្នុងសាលារៀនដែរ។
លោកក៏បញ្ជាក់ដែរថា សម្រាប់ពេលបច្ចុប្បន្ន ពិសេសក្រោយពីការបើកបវេសនកាលឆ្នាំសិក្សាថ្មី ២០២១-២០២២ គឺគ្រប់គ្រឹះស្ថានសិក្សាទាំងរដ្ឋនិងឯកជន បានអនុវត្តនូវវិធានការការពារបានល្អប្រសើរ៕ អត្ថបទ៖ គឹមហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
