ប្រទេសឥណ្ឌា បានប្រកាសកាត់បន្ថយពន្ធលើមុខទំនិញប្រើប្រាស់រាប់រយមុខ មានចាប់ពីសាប៊ូ រហូតដល់រថយន្តធុនតូចដើម្បីជំរុញតម្រូវការក្នុងស្រុក ជាការប្រឈមទៅនឹងវិបត្តិសេដ្ឋកិច្ចពីការដាក់ទណ្ឌកម្មដំឡើងពន្ធធ្វើឡើងដោយប្រធានាធិបតីសហរដ្ឋអាមេរិក លោក Donald Trump។

វិធានការនេះកើតមានឡើងនៅពេលដែលការដំឡើងពន្ធ៥០ភាគរយរបស់សហរដ្ឋអាមេរិកបានចូលជាធរមានកាលពីខែមុន ដែលបានបង្កើនការព្រួយបារម្ភពីការធ្លាក់ចុះសេដ្ឋកិច្ច។

រដ្ឋមន្ត្រីក្រសួងហិរញ្ញវត្ថុ លោក Nirmala Sitharaman បានប្រកាសថា ពន្ធលើទំនិញនិងសេវាកម្មនានា (GST) ត្រូវបានកែប្រែឡើងវិញ ដើម្បីសម្រួលប្រព័ន្ធដ៏ស្មុគស្មាញរបស់ប្រទេសឥណ្ឌា និងកាត់បន្ថយការយកពន្ធលើវិស័យនានា ក្នុងករណីមួយចំនួនលើសពីពាក់កណ្តាល។

លោក Sitharaman បាននិយាយថា គណៈកម្មការមួយក្រុមដែលបានពិនិត្យមើលកំណែទម្រង់ពន្ធលើទំនិញនិងសេវាកម្ម(GST) បានអនុម័តកាត់បន្ថយពន្ធលើទំនិញប្រើប្រាស់ដូចជាថ្នាំដុសធ្មេញ និងសាប៊ូ មកនៅត្រឹម៥ភាគរយពី១៨ភាគរយ និងលើរថយន្តខ្នាតតូច ម៉ាស៊ីនត្រជាក់ និងទូរទស្សន៍មកនៅត្រឹម១៨ ភាគរយពី២៨ភាគរយ។

រដ្ឋមន្ត្រីហិរញ្ញវត្ថុបានទទូចថា ការកាត់បន្ថយពន្ធលើទំនិញនិងសេវាកម្ម (GST) មិនត្រូវបានផ្សារភ្ជាប់ទៅនឹង «ភាពវឹកវរនៃការដំឡើងពន្ធទេ» ដោយនិយាយថាវាជាផ្នែកមួយនៃកំណែទម្រង់ដែលបានគ្រោងទុកជាយូរមកហើយ។