អាជ្ញាធរប្រទេសឥណ្ឌូនេស៊ី បានបណ្តេញមន្ត្រីនគរបាលម្នាក់ជាប់ពាក់ព័ន្ធទៅនឹងការស្លាប់របស់អ្នកបើកបរដឹកជញ្ជូនម្នាក់ដែលបានស្លាប់បន្ទាប់ពីត្រូវបានរថយន្តនគរបាលបើកបុក ក្នុងគោលបំណងដើម្បីបង្ក្រាបការតវ៉ាប្រឆាំងរដ្ឋាភិបាល។

អ្នកនាំពាក្យនគរបាលជាតិ លោក Trunoyudo Wisnu Andiko បាននិយាយកាលពីថ្ងៃពុធថា មន្រ្តី លោក Cosmas K Gae បានប្រព្រឹត្ត «ដោយគ្មានវិជ្ជាជីវៈ» ក្នុងអំឡុងពេលតវ៉ា ដោយពណ៌នាអំពីអាកប្បកិរិយារបស់លោកថាជា «ទង្វើដែលប្រមាថ»។

លោក Trunoyudo បាននិយាយនៅក្នុងការអត្ថាធិប្បាយទៅកាន់អ្នកសារព័ត៌មានថា ជាការដាក់ទណ្ឌកម្ម នេះតម្រូវឱ្យ«បណ្តេញចេញពីសមាជិកនគរបាលជាតិ» ។

មន្ត្រីទទួលទណ្ឌកម្មរូបនេះបាននិយាយថា លោកកំពុងពិចារណាលើបណ្តឹងឧទ្ធរណ៍ ខណៈជោគវាសនារបស់មន្ត្រីចំនួន៦នាក់ផ្សេងទៀតដែលត្រូវបានឃុំខ្លួន មិនទាន់បានកំណត់នៅឡើយទេ។

ចាប់តាំងពីសប្តាហ៍មុន ការតវ៉ាដឹកនាំដោយនិស្សិត កម្មករនិងក្រុមសិទ្ធិមនុស្ស បានផ្ទុះឡើងនៅទូទាំងប្រទេសប្រឆាំងនឹងវិសមភាពសេដ្ឋកិច្ច អត្ថប្រយោជន៍សម្រាប់សមាជិកសភា និងអំពើឃោរឃៅរបស់នគរបាល។

មនុស្សយ៉ាងហោចណាស់១០នាក់ត្រូវបានសម្លាប់ក្នុងអំឡុងពេលបាតុកម្ម ដែលបានបង្កឱ្យមានចោរកម្ម និងកុបកម្មមួយចំនួន ហើយកងកម្លាំងសន្តិសុខបានឆ្លើយតបដោយបានប្រើប្រាស់ឧស្ម័នបង្ហៀរទឹកភ្នែក និងគ្រាប់កាំភ្លើងជ័រ។