សារព័ត៌មាន The Time of Israel បានរាយការណ៍នៅថ្ងៃព្រហស្បតិ៍ (៤ កញ្ញា) នេះថា កាំភ្លើងធំ និងគ្រាប់បែកបានបន្តវាយប្រហារឥតឈប់ឈរនៅជុំវិញទីក្រុងហ្កាហ្សា ដែលជាក្រុងធំបំផុតរបស់ដែនដីហ្កាហ្សាស្រ្ទីប ហើយអ៊ីស្រាអែល បានសន្យាថានឹងដាក់បើកយុទ្ធនាការសឹកថ្មី ដែលធ្វើឱ្យប្រជាជនប៉ាឡេស្ទីននៅទីក្រុងនេះកំពុងរួមរឹតដោយភាពភ័យខ្លាច ដោយមិនប្រាកដចិត្តឡើយថាត្រូវភៀសខ្លួនចេញម្ដងទៀត ឬយ៉ាងណា ហើយនឹងមានអ្វីកើតឡើងប្រសិនបើពួកគេធ្វើបែបនេះ។

អ៊ីស្រាអែល បានប្រកាសថា ទីក្រុងហ្កាហ្សា ដែលស្ថិតនៅភាគខាងជើងនៃទឹកដីនេះ នឹងក្លាយជាតំបន់ប្រយុទ្ធ ខណៈយោធាកំពុងឆ្ពោះទៅមុខ ជាមួយនឹងផែនការគ្រប់គ្រងទីក្រុងនោះ នៅក្នុងយុទ្ធនាការមួយដើម្បីកម្ចាត់ក្រុមហាម៉ាស។ ផ្នែកខ្លះនៃទីក្រុងហ្កាហ្សា ត្រូវចាត់ទុកថាជា "តំបន់ក្រហម" រួចហើយ ដែលប្រជាជនប៉ាឡេស្ទីនត្រូវបញ្ជាឱ្យជម្លៀសខ្លួន មុនពេលមានការប្រយុទ្ធគ្នាខ្លាំងក្លាដែលរំពឹងទុក។

ទាំងអស់នោះធ្វើឱ្យអ្នកស្រុកស្ថិតលើមាត់ជ្រោះ រួមទាំងមនុស្សជាច្រើនដែលវិលត្រឡប់ទៅក្រុងហ្កាហ្សាវិញ បន្ទាប់ពីភៀសខ្លួនចេញពីទីនោះក្នុងដំណាក់កាលដំបូងនៃសង្គ្រាមអ៊ីស្រាអែល-ហាម៉ាស។ អ្នកស្រុកប៉ាឡេស្ទីន ភ័យខ្លាចថា ការចាកចេញពីទីក្រុងនេះនៅក្នុងពេលបច្ចុប្បន្ន អាចមានន័យថាជាចាកចេញមិនវិលវិញ ខណៈយានឈូសឆាយអ៊ីស្រាអែល បានចូលទៅក្នុងសង្កាត់លំនៅឋានមួយចំនួនរួចទៅហើយ ហើយកងទ័ព និងមេដឹកនាំអ៊ីស្រាអែល ក៏គាំទ្រការជម្លៀសទ្រង់ទ្រាយធំរបស់ប្រជាជនប៉ាឡេស្ទីនពីតំបន់ហ្កាហ្សាផងដែរ៕