អ្នកការទូតជាន់ខ្ពស់ជប៉ុន បានប្រាប់ទីភាក់ងារសារព័ត៌មានក្យូដូថា ទីក្រុងតូក្យូសង្ស័យថា រុស្ស៊ី និងចិនអាចបង្កើតសណ្តាប់ធ្នាប់ពិភពលោកថ្មី ខណៈដែលខ្លួនចាត់ទុកព្យុហយាត្រាយោធារបស់ទីក្រុងប៉េកាំង ប្រារព្ធខួបលើកទី ៨០ នៃជ័យជម្នះរបស់ចិនលើការឈ្លានពានរបស់ជប៉ុន ជានិមិត្តរូបនៃការបែងចែកកាន់តែស៊ីជម្រៅ នៅទូទាំងពិភពលោក។ 

ទីភ្នាក់ងារព័ត៌មាននេះ បានដកស្រង់សម្ដីមន្ត្រីម្នាក់ នៅក្រសួងការបរទេសជប៉ុន ដែលបាននិយាយថា៖   «ចិន និងរុស្ស៊ីកំពុងស្វែងរកការដឹកនាំសណ្តាប់ធ្នាប់ពិភពលោកថ្មីមួយ»។ អ្នកការទូតជាន់ខ្ពស់ជប៉ុនម្នាក់ទៀត បានហៅក្បួនដង្ហែយោធា ដែលធ្វើឡើងនៅទីក្រុងប៉េកាំងកាលពីថ្ងៃពុធថា ជា «និមិត្តរូបនៃការបែងចែកជាសកល» ចំពេលអស្ថិរភាពពិភពលោក ដែលបង្កឡើងដោយដំណើរការគោលនយោបាយដែលបន្តដោយរដ្ឋបាលប្រធានាធិបតីអាមេរិកលោក ដូណាល់ ត្រាំ ( Donald Trump) និងពន្ធពាណិជ្ជកម្មរបស់  ខ្លួន។

ទោះជាយ៉ាងណាក៏ដោយ ក្រសួងការបរទេស បានគូសបញ្ជាក់ពីអវត្តមានរបស់ប្រធានាធិបតីកូរ៉េខាងត្បូងពីពិធីបុណ្យនៅទីក្រុងប៉េកាំង បើទោះបីជាលោកបានចូលរួមក្នុងព្រឹត្តិការណ៍ស្រដៀងគ្នា កាលពីមួយទសវត្សរ៍មុនក៏ដោយ។ ទន្ទឹមនឹងនេះ ក្រសួងការបរទេសរបស់ប្រទេសជប៉ុន បានពណ៌នាថា ជាដំណើរទស្សនកិច្ចរបស់មេដឹកនាំកូរ៉េខាងជើងលោក គីម ជុងអ៊ុន (Kim Jong Un) ដែលមិននឹកស្មានដល់ ទៅប្រទេសចិន ចាប់តាំងពីទីក្រុងតូក្យូជឿថា ការបែកបាក់កំពុងរីករាលដាលរវាងទីក្រុងប៉េកាំង និងទីក្រុងព្យុងយ៉ាង ជុំវិញទំនាក់ទំនងរវាងទីក្រុងមូស្គូ ជាមួយទីក្រុងមូស្គូ ក្នុងប៉ុន្មានឆ្នាំថ្មីៗនេះ។ ជាមួយគ្នានេះ ក្រសួងនេះ បានសង្កត់ធ្ងន់ថា ខ្លួននឹងតាមដានពីរបៀបដែលស្ថានការណ៍វិវត្តន៍ និងរបៀបដែលវាអាចប៉ះពាល់ដល់សហគមន៍អន្តរជាតិ៕