បណ្តាប្រទេសនៅអឺរ៉ុប កំពុងប្រឈមនឹងជម្រើសដ៏លំបាក ខណៈក្រុមចម្រុះនៃប្រទេសទាំងនេះ ជួបប្រជុំគ្នា ក្នុងទីក្រុងប៉ារីស នៅថ្ងៃព្រហស្បតិ៍នេះ ដើម្បីពិភាក្សាអំពីការធានាសន្តិសុខសម្រាប់អ៊ុយក្រែនក្រោយសង្រ្គាម។

សង្រ្គាម កំពុងរាលដាលឥតឈប់ឈរ ដោយពុំមានបទឈប់បាញ់កើតឡើងពិតប្រាកដ ហើយបញ្ហា សំខាន់ដែលពាក់ព័ន្ធនឹងការចូលរួមរបស់អាមេរិកក្នុងការធានាសន្តិសុខនាពេលអនាគតរបស់អ៊ុយក្រែននៅតែមិនទាន់ដោះស្រាយបាន។

អស់រយៈពេលជាច្រើនខែមកហើយ អ្វីដែលហៅថា «សម្ព័ន្ធនៃឆន្ទៈ» បាននឹងកំពុងជួបប្រជុំគ្នា ដើម្បីពិភាក្សាអំពីជំនួយសម្រាប់អ៊ុយក្រែន រួមទាំងការគូសវាសផែនការសម្រាប់ការគាំទ្រផ្នែកយោធា ប្រសិនបើបទឈប់បាញ់មួយ កើតមានឡើង ដើម្បីទប់ស្កាត់ការឈ្លានពានរបស់រុស្ស៊ី នាពេលអនាគត។

មេដឹកនាំក្រុមចម្រុះ មានប្រធានាធិបតីបារាំងលោក អេម៉ានុយអែល ម៉ាក្រុង(Emmanuel Macron) និងនាយករដ្ឋមន្រ្តីអង់គ្លេសលោក Keir Starmer បានទទូចថា កម្លាំងធានាសន្តិសុខអឺរ៉ុបណាមួយ នៅក្នុងអ៊ុយក្រែន ត្រូវការការគាំទ្រពីសហរដ្ឋអាមេរិក។ ប៉ុន្តែខណៈពេលដែលប្រធានាធិបតីអាមេរិកលោក ដូណាល់ ត្រាំ បានព្រលយពាក្យថា ប្រទេសរបស់លោក នឹងចូលរួម លោកបានងាកចេញពីការអំពាវនាវឲ្យមានបទឈប់បាញ់ នៅអ៊ុយក្រែន ហើយបានបដិសេធមិនអនុវត្តវិធានការសេដ្ឋកិច្ចបន្ថែមដ៏តឹងរ៉ឹង ដើម្បីដាក់ទណ្ឌកម្មទីក្រុងមូស្គូ។

ទោះបីជាលោក ត្រាំ បាននិយាយថា លោក «ខកចិត្ត» ចំពោះប្រធានាធិបតីរុស្ស៊ី លោក វ្ល៉ាឌីមៀ ពូទីន ហើយបានចេញការគំរាមកំហែងជាច្រើន ដើម្បីព្យាយាមបញ្ឆោតលោក ពូទីន ឲ្យចេញចរចាបញ្ចប់អរិភាពក៏ដោយ ក៏មិនមានលទ្ធផលអ្វីដែរ។ នៅក្នុងកិច្ចប្រជុំជាមួយលោក ពូទីន ក្នុងរដ្ឋអាឡាស្កា ក្នុងខែសីហា លោក ត្រាំ បានបរាជ័យក្នុងការបញ្ចុះបញ្ចូលមេដឹកនាំរុស្ស៊ីឲ្យបញ្ឈប់ការប្រយុទ្ធគ្នា ហើយមិនទាន់បានប្រឹងប្រែង ដើម្បីសម្រួបសម្រួលឲ្យមានការចរចារវាងលោក ពូទីន និងប្រធានាធិបតីអ៊ុយក្រែនលោក វ្ល៉ូឌីមី ហ្សេឡិនស្គី នៅឡើយទេ៕