វ៉ូវីណាម៖ កុមារា អ៊ូ ពុធថាណា បានបង្ហាញនូវក្ដីរីករាយជាខ្លាំង ក្រោយដណ្ដើមបានមេដាយមាសជាលើកទី២ ក្នុងការប្រកួតកីឡាវ៉ូវីណាមជ្រើសរើសជើងឯកថ្នាក់ជាតិ ដ្បិតខ្លួនទើបមានវ័យ ៨ឆ្នាំប៉ុណ្ណោះ។ តាមរយៈសមិទ្ធផលនេះបានធ្វើឲ្យកុមារារូបនេះ មានមហិច្ឆតាកាន់តែធំក្នុងក្ដីស្រម៉ៃឆ្ពោះទៅដណ្ដើមមេដាយលើឆាកអន្ដរជាតិ នាថ្ងៃអនាគត។
កុមារាទើបរៀនថ្នាក់ទី៣ រូបនេះបានបញ្ជាក់ថា នេះជាលើកទី២ ហើយដែលខ្លួនបានចូលរួមប្រកួតជើងឯកថ្នាក់ជាតិ ក្រោយហ្វឹកហាត់រយៈពេល ២ឆ្នាំកន្លងមក។ កាលពីឆ្នាំមុនគេដណ្ដើមបានមេដាយមាសលើវិញ្ញាសាជាក្រុម។ ឯឆ្នាំនេះគេលេង ២វិញ្ញាសាគឺវិញ្ញាសាសម្ដែងមេគុនឯកជន ដែលដណ្ដើមបានមេដាយមាសក្នុងការប្រកួតថ្ងៃបើកឆាកម្សិលមិញ និងការប្រកួតវិញ្ញាសាជាក្រុម។ ពុធថាណា និយាយថា ខ្លួនពិតជាសប្បាយចិត្តដោយមិននឹកស្មានរូបគេ អាចដណ្ដើមបានមេដាយមាសជាបន្ដបន្ទាប់បែបនេះឡើយ ហើយនេះគឺជាកម្លាំងចិត្តមួយដ៏សំខាន់ ដែលជំរុញឲ្យរូបគេកាន់តែខិតខំប្រឹងប្រែងហ្វឹកហាត់ ដើម្បីឈានទៅសម្រេចក្ដីស្រម៉ៃដែលរូបគេដណ្ដើមមេដាយក្នុងការប្រកួតអន្ដរជាតិជូនជាតិនាថ្ងៃអនាគត ដូចសិស្សច្បងរបស់ខ្លួន រហូតដល់ការប៉ងដណ្ដើមមេដាយកម្រិតពិភពលោកទៀតផង។
ទន្ទឹមជាមួយគ្នាកីឡាការិនី ពៅ សុខា បានបង្ហាញនូវមោទនភាពចំពោះភាពរីកចម្រើន នៃក្រុមថ្នាលកីឡាវ៉ូវីណាមកម្ពុជាបច្ចុប្បន្ន ជាក់ស្ដែងដូចជាកីឡាករវ័យក្មេង អ៊ូ ពុធថាណា ដែលសុទ្ធសឹងជាធនធានបន្ដវេនប្រកបដោយសក្ដានុពល ហើយកីឡាការិនីជម្រើសជាតិរូបនេះរំពឹងថា កីឡាករថ្នាលទាំងអស់នេះនឹងបន្ដការខិតខំប្រឹង ដើម្បីមានឱកាសក្នុងការប្រកួតកីឡាយុវជនអាស៊ីលើកទី៥ ដែលកម្ពុជាធ្វើម្ចាស់ផ្ទះនាឆ្នាំ២០២៩ ខាងមុខផងដែរ។ សូមបញ្ជាក់ថា ការប្រកួតកីឡាវ៉ូវីណាមជ្រើសរើសជើងឯកថ្នាក់ជាតិប្រចាំឆ្នាំ២០២១ ដែលលើកមករៀបចំនៅឆ្នាំនេះគឺធ្វើការប្រកួតរយៈពេល ៣ថ្ងៃចាប់ពីថ្ងៃទី២៤ ដល់ថ្ងៃទី២៦ ខែមករា ឆ្នាំ២០២២ នៅទីលាននៃសាកលវិទ្យាល័យភូមិន្ទភ្នំពេញ ដោយមានប្រតិភូ គ្រូបង្វឹក និងកីឡាករ-កីឡាការិនីចូលរួមសរុប ៨៦នាក់មកពី ៩សមាគម/ក្លិប និងក្រសួង ក្នុងនោះមានកីឡាករ ៣៤នាក់ និងកីឡាការិនី ២៤នាក់ដែលធ្វើការប្រកួតលើវិញ្ញាសាចំនួន ១៧វិញ្ញាសា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
