ប្រធានាធិបតីអ៊ីរ៉ង់លោក ម៉ាស៊ូដ ប៉េហ្សេស្គីអាន (Masoud Pezeshkian) បាននិយាយកាលពីថ្ងៃពុធថា ការអនុវត្តកិច្ចព្រមព្រៀងដែលបានឈានដល់ក្នុងអំឡុងកិច្ចប្រជុំកំពូលអង្គការសហប្រតិបត្តិការសៀងហៃ (SCO) ឆ្នាំ២០២៥ នឹងបង្កើតទស្សនវិស័យអំណោយផលសម្រាប់ប្រទេសលោកនៅក្នុងវិស័យសេដ្ឋកិច្ច សន្តិសុខ វិទ្យាសាស្ត្រ និងទេសចរណ៍។

លោកបានថ្លែងដូច្នេះនៅពេលទៅដល់រដ្ឋធានីតេអេរ៉ង់ប្រទេសអ៊ីរ៉ង់វិញពីប្រទេសចិនជាកន្លែងដែលលោកបានចូលរួមក្នុងកិច្ចប្រជុំកំពូលនៅក្នុងទីក្រុងធានជីន(Tianjin) និងខួបលើកទី៨០នៃជ័យជំនះក្នុងសង្គ្រាមប្រជាជនចិននៃការតស៊ូប្រឆាំងការឈ្លានពានរបស់ជប៉ុននិងសង្គ្រាមប្រឆាំងហ្វាស៊ីសពិភពលោកនៅទីក្រុងប៉េកាំង។

លោក Pezeshkian បាននិយាយថា «យើងបានសង្កត់ធ្ងន់លើសន្តិភាព ដោយផ្អែកលើសិទ្ធិ និងយុត្តិធម៌» នៅក្នុងកិច្ចប្រជុំអង្គការសហប្រតិបត្តិការសៀងហៃ (SCO) បូក ហើយប្រទេសចិនបានស្នើឱ្យមានគំនិតផ្តួចផ្តើមអភិបាលកិច្ចសកល «ក្នុងនោះក្របខ័ណ្ឌផ្អែកលើសច្ចភាពនិងយុត្តិធម៌ និងវិធាននានាគួរតែត្រូវបានគោរព ហើយស្តង់ដារពីរ មិនគួរត្រូវបានយកមកអនុវត្តទេ» ។

លោកក៏បានលើកឡើងពីឯកសារលទ្ធផលចំនួន២៤ ស្តីពីការពង្រឹងកិច្ចសហប្រតិបត្តិការអង្គការសហប្រតិបត្តិការសៀងហៃ (SCO) ក្នុងវិស័យដូចជា សន្តិសុខ សេដ្ឋកិច្ច និងទំនាក់ទំនងរវាងប្រជាជន និងប្រជាជន ដោយបាននិយាយថា «សមិទ្ធិផលដ៏សំខាន់បំផុតនៃដំណើរទស្សនកិច្ចនេះ គឺឱកាសដើម្បីជួបពិភាក្សាផ្ទាល់ជាមួយមេដឹកនាំប្រទេសដែលបានមកចូលរួម»។