សេតវិមាន បានដកអង្គការពាណិជ្ជកម្មពិភពលោក (WTO) ដោយស្ងាត់ៗ ចេញពីបញ្ជីកាត់បន្ថយជំនួយបរទេសចំនួន ៤,៩ពាន់លានដុល្លារអាមេរិក ដែលបានប្រកាសកាលពីថ្ងៃទី២៩ ខែសីហា បន្ទាប់ពីការសម្រេចនេះបានបង្កឲ្យមានក្ដីបារម្ភ ក្នុងចំណោមសមាជិកសភា ក្រុមពាណិជ្ជកម្ម និងប្រធានស្ថាប័នពាណិជ្ជកម្មពិភពលោក។

សមាជិកសភាគណបក្សប្រជាធិបតេយ្យ បានលើកឡើងថា ការកាត់បន្ថយជាឯកតោភាគីរបស់រដ្ឋបាលនេះ គឺខុសច្បាប់ ពីព្រោះការផ្តល់មូលនិធិ ត្រូវបានអនុញ្ញាតដោយសភា ហើយក្រុមពាណិជ្ជកម្ម បានលើកហេតុផលថា ការកាត់បន្ថយការផ្តល់មូលនិធិ សម្រាប់ WTO នឹងផ្តល់ផលចំណេញឲ្យទៅប្រទេសចិន។

នៅក្នុងបទសម្ភាសន៍មួយ កាលពីថ្ងៃអង្គារ (ទី២ ខែកញ្ញា) អគ្គនាយក WTO លោកស្រី Ngozi Okonjo-Iweala បានប្រាប់សារព័ត៌ Reuters ថា លោកស្រី បាននិងកំពុងធ្វើការជាមួយការិយាល័យតំណាងពាណិជ្ជកម្មអាមេរិកដឹកនាំដោយលោក Jamieson Greer និងមន្ត្រីដទៃទៀត នៅក្នុងរដ្ឋបាលរបស់លោកប្រធានាធិបតី Donald Trump ដើម្បីដោះស្រាយបញ្ហានេះ។

សេចក្តីប្រកាសកាលពីថ្ងៃទី២៩ ខែសីហា បានបញ្ជាក់ពីការផ្តល់មូលនិធិចំនួន ២៩លានដុល្លារដល់ WTO ជាឧទាហរណ៍នៃការរួមចំណែករបស់សហរដ្ឋអាមេរិក ចំពោះកម្មវិធីអន្តរជាតិ ដែលបំពានលើអាទិភាពអាមេរិកទី១ របស់លោក Trump។ រដ្ឋបាលនេះបានពិពណ៌នា WTO ថា បានបរាជ័យក្នុងការដោះស្រាយជម្លោះពាណិជ្ជកម្មសកល។

កាលពីថ្ងៃទី៣ ខែកញ្ញា ឯកសារយោងរបស់ WTO ត្រូវបានដកចេញពីគេហទំព័ររបស់សេតវិមាន។ តែប្រភពពាណិជ្ជកម្មដែលដឹងពីបញ្ហានេះ បានប្រាប់ថា ការផ្តល់មូលនិធិដល់ WTO មិនត្រូវបានកាត់បន្ថយទៀតទេ ប៉ុន្តែមិនបានផ្តល់ព័ត៌មានលម្អិតបន្ថែមឡើយ៕