រដ្ឋមន្ត្រីការបរទេសអាមេរិក លោក Marco Rubio កាលពីថ្ងៃពុធ (ទី៣ ខែកញ្ញា) បានប្ដេជ្ញាថា សហរដ្ឋអាមេរិកនឹងបង្កើនការវាយប្រហារលើក្រុមជួញដូរខុសច្បាប់ បន្ទាប់ពីបានបំផ្ទុះទូកដែលត្រូវបានចោទប្រកាន់ថា ដឹកគ្រឿងញៀន ដែលលោកបានភ្ជាប់ទំនាក់ទំនងទៅប្រទេសវេណេហ្ស៊ុយអេឡា ប៉ុន្តែលោកបានធានាដល់ម៉ិកស៊ិក អំពីការគោរព ចំពោះអធិបតេយ្យភាពរបស់ប្រទេសនេះ។

ជាកិច្ចប្រជុំកម្រិតខ្ពស់បំផុត រវាងប្រទេសជិតខាងទាំង២ ចាប់តាំងពីប្រធានាធិបតីអាមេរិក លោក Donald Trump វិលទៅគ្រប់គ្រងកៅអីសេតវិមានវិញ លោក Rubio បានជួបប្រជុំរយៈពេល ១ម៉ោងកន្លះ នៅទីក្រុង Mexico ជាមួយប្រធានាធិបតី លោកស្រី Claudia Sheinbaum ដែលបានស្វែងរកកិច្ចសហប្រតិបត្តិការយ៉ាងស្ងាត់ៗ ក្នុងទំនាក់ទំនងដ៏ស្មុគស្មាញជាមួយទីក្រុងវ៉ាស៊ីនតោន។ 

លោក Rubio គ្រោងនឹងជួបមេដឹកនាំប្រទេសអេក្វាឌ័រ នៅថ្ងៃព្រហស្បតិ៍ (ទី៤ ខែកញ្ញា) នេះ ដែលដឹកនាំដោយសម្ព័ន្ធមិត្តស្តាំនិយម គឺលោក Daniel Noboa។ ដំណើរទស្សនកិច្ចនេះ បានកើតឡើងមួយថ្ងៃបន្ទាប់ពីលោក Trump បាននិយាយថា កងកម្លាំងអាមេរិក បានបំផ្ទុះទូកដែលត្រូវបានចោទប្រកាន់ថា ដឹកគ្រឿងញៀន នៅតំបន់ការ៉ាអ៊ីប ដែលលោកបានបញ្ជាក់ថា ជាកម្មសិទ្ធិរបស់អង្គការឧក្រិដ្ឋកម្មភ្ជាប់ទំនាក់ទំនងជាមួយប្រធានាធិបតីឆ្វេងនិយមវេណេហ្ស៊ុយអេឡា លោក Nicolas Maduro ជាអ្នកដែលត្រូវបានសហរដ្ឋអាមេរិកចាត់ទុកជាសត្រូវ។

កាលពីថ្ងៃទី២៧ ខែសីហា រដ្ឋមន្ត្រីមហាផ្ទៃវេណេហ្ស៊ុយអេឡា លោក Diosdado Cabello បានចោទប្រកាន់សហរដ្ឋអាមេរិកថា បានប្រព្រឹត្តអំពើឃាតកម្មក្រៅប្រព័ន្ធតុលាការ នៅក្នុងការវាយប្រហារនេះ ដោយនិយាយថា «មនុស្ស ១១នាក់ត្រូវបានសម្លាប់ ដោយគ្មានដំណើរការតាមច្បាប់ត្រឹមត្រូវ»៕