ក្រសួងការបរទេសចិន បាននិយាយនៅថ្ងៃព្រហស្បតិ៍នេះថា ប្រទេសចិន មិនកំណត់គោលដៅទៅលើភាគីទី៣ណាមួយឡើយ ខណៈពេលដែលកំពុងបង្កើតទំនាក់ទំនងការទូត ជាមួយប្រទេសដទៃទៀត ដោយឆ្លើយតបទៅនឹងការអត្ថាធិប្បាយរបស់ប្រធានាធិបតីអាមេរិក លោក ដូណាល់ ត្រាំ ដែលថា ចិន រុស្ស៊ី និងកូរ៉េខាងជើង កំពុងសមគំនិតប្រឆាំងនឹងសហរដ្ឋអាមេរិក។

នៅក្នុងការបង្ហោះដែលសំដៅលើប្រធានាធិបតីចិនលោក ស៊ី ជីងពីង នៅលើបណ្តាញផ្សព្វផ្សាយសង្គម Truth Social ខណៈដែលក្បួនព្យុហយាត្រាយោធាដ៏ធំ បានចាប់ផ្តើមនៅទីក្រុងប៉េកាំង កាលពីថ្ងៃពុធ លោក ត្រាម បានលើកឡើងពីតួនាទីរបស់សហរដ្ឋអាមេរិក ក្នុងការជួយប្រទេសចិនទទួលបានសេរីភាពពីប្រទេសជប៉ុន ក្នុងអំឡុងសង្គ្រាមលោកលើកទី២។

លោក ត្រាំ បានបន្ថែមថា៖«ខ្ញុំសូមគោរពយ៉ាងកក់ក្តៅបំផុតចំពោះលោក វ្ល៉ាឌីមៀ ពូទីន និងលោក        គីម   ជុងអ៊ុន ខណៈដែលអ្នកបានសមគំនិតគ្នាប្រឆាំងនឹងសហរដ្ឋអាមេរិក»៕