បាល់ទាត់៖ ក្លិបអង្គរថាយហ្គឺរបានប្រកាសនាំចូលសមាជិកថ្មី ១រូបទៀតដើម្បីពង្រឹងក្រុមត្រៀមរដូវកាលថ្មីឆ្នាំ២០២២ ខាងមុខគឺខ្សែប្រយុទ្ធវ័យក្មេង ម៉ៅ ពិសិដ្ឋ ដែលផ្ទេរមកពីក្លិបភ្នំពេញក្រោនក្រោមលក្ខខណ្ឌខ្ចីជើង។ នេះគឺជាលើកដំបូងហើយដែល ម៉ៅ ពិសិដ្ឋ បានចាកចេញពីក្រុមសិង្ហក្រហម បន្ទាប់ពីចំណាយពេល ៨ឆ្នាំតាំងពីខ្លួនចូលហាត់ជាមួយក្រុមយុវជនថ្នាលកាលពីឆ្នាំ២០១៣។
ពិសិដ្ឋ ក៏ជាកីឡាករទី២ របស់ភ្នំពេញក្រោនដែលត្រូវបានក្លិបអង្គរថាយហ្គឺរខ្ចីជើងផងដែរ បន្ទាប់ពីកីឡាករ សឿត បារាំង ដែលទើបផ្ទេរទៅកាន់ក្លិបចាស់វិញកាលពីថ្មីៗ។ សូមបញ្ជាក់ថា យុវជនមានដើមកំណើតពីខេត្តព្រៃវែងរូបនេះ បានផ្ដើមអាជីពបាល់ទាត់ដំបូងជាមួយក្រុមយុវជន U14 ខេត្តព្រៃវែងកាលពីឆ្នាំ២០១៣ មុនរូបគេទៅធ្វើតេស្ដជាមួយក្រុមយុវជនភ្នំពេញក្រោន ហើយបានជាប់ និងបានហ្វឹកហាត់មកទល់បច្ចុប្បន្ន។ រយៈពេល ៨ឆ្នាំចុងក្រោយនេះ ក្រៅពីដំឡើងឲ្យលេងក្រុមធំភ្នំពេញក្រោន ម៉ៅ ពិសិដ្ឋ ក៏តែងទទួលបានការទុកចិត្តពីគ្រូបង្វឹកក្រុមជម្រើសជាតិយុវជនរហូតដល់ក្រុមធំ កោះហៅចូលរួមហ្វឹកហាត់ និងប្រកួតលើកឆាកអន្ដរជាតិរឿយៗផងដែរ។ តែអ្វីដែលអ្នកគាំទ្រចាំមិនភ្លេចគឺរូបគេរកបាន ២គ្រាប់ជួយក្រុម U16 កម្ពុជាយកឈ្នះ U16 ទីម័រខាងកើត ៣-០ ហើយឡើងវគ្គពាក់កណ្ដាលផ្ដាច់ព្រ័ត្រនៃពានរង្វាន់ AFF U-16 Championship 2016 តែម្ដង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
