ក្មេងៗហ្កាហ្សានៅទីក្រុង Nuseirat នាំគ្នារៀនរាំតាមចង្វាក់ភ្លេង ដោយសង្ឃឹមថា វានឹងអាចបន្លប់អារម្មណ៍របស់ពួកគេ ភ្លេចរឿងពិតនៃសង្រ្គាមនៅជុំវិញពួកគេ ។

ក្មេងៗទាំងនេះ គឺជាផ្នែកមួយនៃក្រុមរាំក្បាច់ Camps Breakerz ដែលបន្តប្រតិបត្តិការនៅតំបន់ហ្កាហ្សា បើទោះបីជាមានសង្រ្គាម និងការជម្លៀសខ្លួនក៏ដោយ ។

តាមរយៈកម្មវិធី “Rise for Gaza”របស់ខ្លួន ក្រុមរាំក្បាច់នេះ មានគោលបំណងផ្តល់ការធូរស្បើយផ្លូវចិត្ត និងការថែទាំក្មេងៗចន្លោះ ៥០-៧០នាក់ដែលបានចុះឈ្មោះរៀនរាំ ។

ក្មេងស្រី Lynn Al-Khor អាយុ ១៤ឆ្នាំ ដែលបានជម្លៀសចេញពីសង្កាត់ Zeitoun នៅទីក្រុងហ្កាហ្សា និយាយថា ពេលដែលនាងហ្វឹកហាត់នៅទីនេះ វាបានធ្វើឲ្យនាងមានអារម្មណ៍ស្រស់ស្រាយជាងនៅក្នុងបរិយាកាសសង្រ្គាម ។ នាងមានអារម្មណ៍ខុសប្លែកពីមុន នាងមានអារម្មណ៍ល្អប្រសើរច្រើន ។

ក្មេងស្រី Lynn រស់នៅជាមួយឪពុកម្តាយរបស់នាង និងបងប្អូនបង្កើត ៤នាក់ នៅក្នុងសំពត់តង់ ។ អ្នកស្រី Maha ដែលជាម្តាយរបស់ក្មេងស្រី Lynn និយាយថា កម្មវិធីរាំ បានផ្តល់អ្វីមួយដល់កូនស្រីរបស់គាត់ ដើម្បីសំឡឹងមើលឆ្ពោះទៅមុខ ។

ដោយបង្កើតឡើងនៅឆ្នាំ ២០០៤ ក្រុមរាំក្បាច់ Camps Breakerz បានក្លាយជាមធ្យោបាយមួយសម្រាប់ការបញ្ចេញមតិខ្លួនឯងនៅតំបន់ហ្កាហ្សា ជាទីដែលសង្រ្គាមបានឆក់យកជីវិតរស់នៅធម្មតារបស់ក្មេងៗ ។

លោក Ahmad Al-Awadi គឺជាគ្រូបង្វឹកដឹកនាំការរាំក្បាច់ និយាយថា ពួកយើងបានរៀបចំកម្មវិធីរាំ អំឡុងពេលវេលាដ៏លំបាកទាំងនេះ ដើម្បីលើកកម្ពស់ការយល់ដឹង ហើយនិងផ្តល់ភាពធូរស្រាលផ្នែកផ្លូវចិត្ត គឺជាអ្វីមួយដែលអាចជួយក្មេងៗទប់ទល់នឹងបរិយាកាសសង្រ្គាមដែលពួកគេកំពុងរស់នៅជាមួយ ។