ស្ថានភាពអាកាសធាតុក្តៅ ស្ងួត និងខ្យល់ខ្លាំង នារដូវក្ដៅនេះ ដែលបានបង្កឲ្យមានចំហេះព្រៃដ៏អាក្រក់បំផុត នៅប្រទេសអេស្ប៉ាញជាលើកដំបូង ក្នុងរយៈពេលយ៉ាងហោចណាស់ ៣ទសវត្សរ៍ ទំនងជាមានឱកាសកើតឡើងជាងមុន ៤០ដង ដោយសារបម្រែបម្រួលអាកាសធាតុដែលបង្កឡើងដោយមនុស្ស។ នេះបើយោងតាមការវិភាគពីស្ថាប័ន World Weather Attribution (WWA)។

WWA គឺជាការសហការអន្តរជាតិដែលបានធ្វើការសិក្សាជាង ១១០ដង លើឥទ្ធិពលដែលអាចកើតមានពីបម្រែបម្រួលអាកាសធាតុ ពាក់ព័ន្ធនឹងព្រឹត្តិការណ៍អាក្រក់អាកាសធាតុធ្ងន់ធ្ងរ។

ទិន្នន័យអាកាសធាតុដែលបានវិភាគដោយក្រុមអ្នកវិទ្យាសាស្ត្រចំនួន ១៣នាក់ បានរកឃើញថា ស្ថានភាពអាកាសធាតុអាក្រក់ធ្ងន់ធ្ងរដែលបណ្តាលឲ្យមានអគ្គិភ័យ កាលពីខែមុន នៅភាគពាយព្យនៃឧបទ្វីប Iberian ក្នុងនោះរួមទាំងនៅប្រទេសព័រទុយហ្គាល់ផងដែរ ទំនងជាកើតឡើងវិញរៀងរាល់ ១៥ឆ្នាំម្តង ដោយសារអាកាសធាតុបច្ចុប្បន្ននេះ។

អាកាសធាតុ គឺក្ដៅជាងមុន ១,៣អង្សាសេ បើប្រៀបធៀបទៅនឹងកម្រិតមុនឧស្សាហកម្ម នៅពេលដែលព្រឹត្តិការណ៍បែបនេះ នឹងត្រូវបានគេរំពឹងថា នឹងកើតឡើងរៀងរាល់ ៥០០ឆ្នាំម្តង។

ចំហេះព្រៃបានបំផ្លាញផ្ទៃដីជាង ១លានហិកតា នៅក្នុងសហភាពអឺរ៉ុប នារដូវក្តៅនេះ ដោយប្រទេសអេស្ប៉ាញ និងព័រទុយហ្គាល់ មានចំនួនប្រហែល ២ភាគ៣ នៃចំនួនសរុបនោះ។

អគ្គិភ័យទាំងនោះ បានសម្លាប់មនុស្សយ៉ាងតិច ៨នាក់ បង្ខំឲ្យមានការជម្លៀសមនុស្សរាប់ពាន់នាក់ ហើយបិទផ្លូវរថភ្លើង និងផ្លូវហាយវេ នៅក្នុងតំបន់មួយចំនួន។ ការឆាបឆេះទាំងនេះកើតឡើងស្របពេលជាមួយនឹងការមានរលកកម្ដៅរយៈពេល ១៦ថ្ងៃ ដែលជាកម្រិតក្ដៅខ្លាំងបំផុត គិតចាប់តាំងពីកំណត់ត្រាត្រូវបានចាប់ផ្តើមកត់ត្រា៕