គណបក្សដែលកំពុងកាន់អំណាចរបស់ប្រទេសថៃ គឺ Pheu Thai (ភឿថៃ) នៅថ្ងៃព្រហស្បតិ៍ (ទី៤ ខែកញ្ញា) នេះ បានឲ្យដឹងថា ខ្លួននឹងតែងតាំងបេក្ខជនរបស់បក្ស នៅមុនដំណើរការបោះឆ្នោតសភា ដើម្បីជ្រើសរើសនាយករដ្ឋមន្ត្រីថ្មី ក្នុងសប្តាហ៍នេះ ជាការសម្រេចដ៏យឺតយ៉ាវដែលអាចផ្ដល់ភាពស្មុគស្មាញដល់ការប៉ុនប៉ងរបស់គណបក្សគូប្រជែង គឺ Bhumjaithai (ភូមិចៃថៃ) និងកិច្ចព្រមព្រៀងរបស់គណបក្សនេះជាមួយបក្សប្រឆាំង។

បន្ទាប់ពីលោកស្រី Paetongtarn Shinawatra បានបាត់បង់តំណែងនាយករដ្ឋមន្ត្រី ដោយសារសេចក្តីសម្រេចរបស់តុលាការ កាលពីសប្តាហ៍មុន គណបក្ស Pheu Thai ដែលបានជួបនឹងការលំបាក ក្នុងការបញ្ចុះបញ្ចូលឲ្យមានការគាំទ្រនោះ បានបញ្ជាក់ថា ខ្លួននឹងតែងតាំងលោក Chaikasem Nitisiri ដែលមិនសូវមានបទពិសោធន៍ក្នុងគណៈរដ្ឋមន្ត្រី ដើម្បីទៅប្រជែងជាមួយមេដឹកនាំរបស់គណបក្ស Bhumjaithai គឺលោក Anutin Charnvirakul សម្រាប់តំណែងជានាយករដ្ឋមន្ត្រី។

ជាការកែប្រែដ៏គួរភ្ញាក់ផ្អើលចុងក្រោយបង្អស់ នៅក្នុងភាពវឹកវរផ្នែកនយោបាយថៃ នាប៉ុន្មានថ្ងៃនេះ គណបក្ស Pheu Thai បានឲ្យដឹងថា ខ្លួនបានរៀបចំត្រៀមប្រកាសការបោះឆ្នោតមុនអាណត្តិ ប្រសិនបើលោក Chaikasem អតីតអគ្គព្រះរាជអាជ្ញាវ័យ ៧៧ឆ្នាំ ទទួលបានសំឡេងដែលត្រូវការគ្រប់គ្រាន់ ដើម្បីក្លាយជានាយករដ្ឋមន្ត្រី នៅថ្ងៃទី៥ ខែកញ្ញា។

ការសម្រេចរបស់គណបក្ស Pheu Thai នេះ អាចផ្ដល់បញ្ហាប្រឈមដល់កិច្ចព្រមព្រៀងដែលបានប្រកាសកាលពីមួយថ្ងៃមុននោះ រវាងគណបក្ស Bhumjaithai និង People’s Party (គណបក្សប្រជាជន) ដែលជាកម្លាំងដ៏ធំបំផុត នៅក្នុងសភា ជាអ្វីដែលលោក Anutin នឹងទទួលបានការគាំទ្រទាំងស្រុង ជាថ្នូរនឹងការសន្យាររំលាយសភា ក្នុងរយៈពេល ៤ខែ៕