ទីភ្នាក់ងារសារព័ត៌មាន Mehr ពាក់កណ្តាលផ្លូវការរបស់អ៊ីរ៉ង់ បានរាយការណ៍ថា មន្ត្រីសន្តិសុខអ៊ីរ៉ង់ និងអង់គ្លេសកាលពីថ្ងៃពុធ បានជួបពិភាក្សាគ្នាអំពីអនាគតនៃការចរចានុយក្លេអ៊ែរ និងការដាក់ទណ្ឌកម្មរបស់អង្គការសហប្រជាជាតិឡើងវិញ។

លោក Ali Larijani លេខាក្រុមប្រឹក្សាសន្តិសុខជាតិកំពូលរបស់អ៊ីរ៉ង់ បាននិយាយតាមទូរស័ព្ទជាមួយ លោក Jonathan Powell ទីប្រឹក្សាសន្តិសុខជាតិរបស់នាយករដ្ឋមន្ត្រីអង់គ្លេស។ ពួកគេបានពិភាក្សាអំពីកិច្ចខិតខំប្រឹងប្រែងដើម្បីស្តារឡើងវិញនូវកិច្ចពិភាក្សាស្តីពីកម្មវិធីនុយក្លេអ៊ែររបស់ទីក្រុងតេអេរ៉ង់ និងយន្តការ«តាមផ្លូវច្បាប់» ដែលបានធ្វើឲ្យដំណើរការកាលពីខែមុន ដោយចក្រភពអង់គ្លេស បារាំង និងអាល្លឺម៉ង់ ដែលអាចស្តារទណ្ឌកម្មអន្តរជាតិឡើងវិញ។ របាយការណ៍ បានបញ្ជាក់ថា ភាគីទាំងពីរ បានសង្កត់ធ្ងន់លើតម្រូវការក្នុងការរក្សាបណ្តាញបើកចំហ និងស្វែងរកដំណោះស្រាយតាមរយៈការចរចា។

ប្រទេសអ៊ីរ៉ង់ បានចុះហត្ថលេខាលើផែនការសកម្មភាពគ្រប់ជ្រុងជ្រោយរួមឆ្នាំ ២០១៥ ដោយសន្យាថា នឹងកំណត់សកម្មភាពនុយក្លេអ៊ែររបស់ខ្លួន ជាថ្នូរនឹងការបន្ធូរបន្ថយទណ្ឌកម្ម។ សហរដ្ឋអាមេរិក បានដកខ្លួនចេញពីកិច្ចព្រមព្រៀងនេះ ក្នុងឆ្នាំ ២០១៨ និងបានដាក់ទណ្ឌកម្មឡើងវិញ ដែលជំរុញឲ្យទីក្រុងតេអេរ៉ង់ កាត់បន្ថយការប្តេជ្ញាចិត្តមួយចំនួន។ នៅក្រោមបទប្បញ្ញត្តិនៃកិច្ចព្រមព្រៀងនេះ ប្រទេសហត្ថលេខីដែលនៅសេសសល់ អាចដាក់ទណ្ឌកម្មឡើងវិញ ប្រសិនបើអ៊ីរ៉ង់ ត្រូវបានវិនិច្ឆ័យថា បានរំលោភបំពាន៕