ទូរទស្សន៍រដ្ឋចិន CCTV បានរាយការណ៍ថា ប្រធានាធិបតីចិន លោក Xi Jinping និងមេដឹកនាំកូរ៉េខាងជើង លោក Kim Jong Un បានជួបប្រជុំពិភាក្សាអំពីបញ្ហាផ្សេង នៅទីក្រុងប៉េកាំង នាថ្ងៃព្រហស្បតិ៍ (ទី៤ ខែកញ្ញា) នេះ។

នៅក្នុងសន្និសីទសារព័ត៌មានប្រចាំថ្ងៃ នាព្រឹកមិញថ្ងៃនេះ អ្នកនាំពាក្យក្រសួងការបរទេសចិន លោក Guo Jiakun បានប្រាប់អ្នកសារព័ត៌មានថា កិច្ចប្រជុំនេះនឹងគ្របដណ្តប់លើទំនាក់ទំនងទ្វេភាគី និងបញ្ហានៃការមានកង្វល់ទៅវិញទៅមក ហើយ «មានសារៈសំខាន់ណាស់»។

លោក Guo បានឲ្យដឹងទៀតថា៖ «ប្រទេសចិនត្រៀមខ្លួនជាស្រេច ក្នុងការពង្រឹងទំនាក់ទំនងជាយុទ្ធសាស្ត្រ និងលើកកម្ពស់ការផ្លាស់ប្តូរ និងកិច្ចសហប្រតិបត្តិការជាមួយ DPRK (សាធារណរដ្ឋប្រជាមានិតប្រជាធិបតេយ្យកូរ៉េ) ធ្វើឲ្យកាន់តែស៊ីជម្រៅនូវការចែករំលែកបទពិសោធន៍អភិបាលកិច្ច និងជំរុញបុព្វហេតុសង្គមនិយមរៀងៗខ្លួន ហើយនិងទំនាក់ទំនងសហប្រតិបត្តិការមិត្តភាពជាប្រពៃណី រវាងចិន និង DPRK»។

ការជួបពិភាក្សានេះកើតឡើងបន្ទាប់ពីមានការប្រារព្ធពិធីព្យុហយាត្រាយោធា នៅទីក្រុងប៉េកាំង កាលពីថ្ងៃពុធ (ទី៣ ខែកញ្ញា) ដែលលោក Kim បានចូលរួមជាមួយនឹងប្រធានាធិបតីរុស្ស៊ី លោក Vladimir Putin ។ មេដឹកនាំទាំង២ ត្រូវបានគេឃើញដើរ និងជជែកជាមួយលោក Xi ក្នុងអំឡុងពេលមានព្រឹត្តិការណ៍ដ៏ធំដែលចិនប្រើជាការបង្ហាញកម្លាំង។

លោក Kim បានទៅដល់ទីក្រុងប៉េកាំងតាមរថភ្លើងពាសដែកពណ៌បៃតងដ៏ពិសេសរបស់លោក កាលពីថ្ងៃអង្គារ រួមជាមួយនឹងកូនស្រីវ័យជំទង់របស់លោក ដែលបានបង្ហាញមុខជាសាធារណៈលើកដំបូង នៅក្រៅប្រទេស៕