​បាល់ទាត់៖ ​ក្រុម​ម្ចាស់​ផ្ទះកា​មេ​រូ​ន​បាន​បន្ដដំណើរ​ឈានឡើង​វគ្គ ៨​ក្រុម​ចុងក្រោយ​ហើយ​នៃ​ការប្រកួត​បាល់ទាត់​ជើងឯក​ទ្វីបអាហ្វ្រិក Africa Cup of Nations ក្រោយ​យកឈ្នះ​កោះ​កូ​ម៉ូ​រ៉ូ​ស ២-១​។ ​​មុន​ការប្រកួត​ចាប់ផ្តើម​ក៏មាន​បញ្ហា​កើតឡើង​ផងដែរ​នៅ​កីឡដ្ឋាន Paul Biya Stadium រដ្ឋ​ធាន Yaounde ពោលគឺ​មនុស្ស​ព្យាយាម​សំរុកចូល​កីឡដ្ឋាន​ ខណៈ​មាន​សេចក្តីរាយការណ៍​ថា ​យ៉ាងហោចណាស់​មនុស្ស ៦នាក់​ស្លាប់ និង​ជាច្រើននាក់​រងរបួស​។

​​ការប្រកួត​នៅតែ​ដំណើរ​ទៅមុខ​បើទោះជា​មួយ​បញ្ហា​ក្តី ដោយ​ក្រុម​ម្ចាស់ផ្ទះ​កា​មេ​រូ​នរក​បាន ២​គ្រាប់​នាំមុខ​ដោយ Karl Toko Ekambi និង Vincent Aboubakar បន្ទាប់ពី​កូ​ម៉ូ​រូស​បាន​កាត​ក្រហម​តាំងពី​នាទី​ទី៧ លើ​កីឡាករ Nadjim Abdou តែ​ក៏​តប​បាន​មួយ​គ្រាប់​វិញ​ដែរ​នៅ​ចុង​ម៉ោង​ដោយ Youssouf M’Changama​។​ ​​ចប់​ការប្រកួត​កា​មេ​រូ​ន​ឡើង​វគ្គ ៨ក្រុម​ចុងក្រោយ​ដោយ​នឹងត្រូវ​ជួប​ជាមួយ​ហ្កាំ​ប៊ី​។ ​​ហ្កាំ​ប៊ី​យប់មិញ​បាន​យកឈ្នះ​ហ្គី​ណេ​តានតឹង ១-០ និង​មាន​កីឡាករ​ពីរ​នាក់​ត្រូវបាន​បណ្តេញចេញ​នៅ​ចុង​ម៉ោង​។

​​ខ្សែប្រយុទ្ធ Bologna, Musa Barrow គឺជា​អ្នកសំរេច​គ្រាប់​ជ័យជំនះ​ឱ្យ​ហ្កាំ​ប៊ី​នៅ​នាទី​ទី៧១ មុន​ពេលដែល​ក្រុម​ទាំងពីរ​បាត់បង់​កីឡាករ​ម្ខាង​ម្នាក់​ដោយ​ខ្សែការពារ​ហ្កាំ​ប៊ី Yusupha Njie បាន​កាត​លឿង​ទី​ពីរ និង​ខ្សែការពារ​ហ្គី​ណេ Ibrahim Conte បាន​កាត​លឿង​ទី​ពីរ​នៅ​នាទី​ទី៩០+៣​។ ​​ហ្កាំ​ប៊ី​ដែលមាន​ចំណាត់ថ្នាក់​លេខ ១៥០ ពិភពលោក​ទើបតែ​បានបង្ហាញ​ខ្លួន​លើកដំបូង​ប៉ុ​ណ្ណ៉ោះ ​ក្នុង​ព្រឹត្តិការណ៍​បាល់ទាត់​ជើងឯក​ទ្វីបអាហ្វ្រិក​នេះ​តែ​ពួកគេ​ឈានឡើង​ដល់​វគ្គ ៨ក្រុម​ចុងក្រោយ​ដោយ​នឹងត្រូវ​ជួប​ជាមួយ​ម្ចាស់​ផ្ទះកា​មេ​រូ​ន​ នៅ​ថ្ងៃ​សៅរ៍​ចុង​សប្តាហ៍​នេះ​៕

​អត្ថបទ​៖​នាង សុភា​វុ​ធ