​អឺរ៉ុប៖ អង្គការ​ NATO ​បានប្រកាស​កាលពី​ថ្ងៃ​ចន្ទ​ថា ប្រទេស​សមាជិក​មួយចំនួន​កំពុង​ដាក់​កម្លាំង​ត្រៀម​ និងបញ្ជូន​នាវា និង​យន្តហោះចម្បាំង​បន្ថែមទៀត​ទៅកាន់​អឺរ៉ុប​ខាងកើត ខណៈ​ចក្រភព​អង់គ្លេស និងសហរដ្ឋអាមេរិក​បាន​បញ្ជា​ឱ្យ​ក្រុមគ្រួសារ​អ្នកការទូត​ចាក​ចេញពី​អ៊ុយ​ក្រែ​ន ស្របពេល​មានការ​ព្រួយបារម្ភ​ពី​ការឈ្លានពាន​របស់​រុស្ស៊ី​។​

​ការវិវឌ្ឍ​ន៍​នេះ​បាន​គូសបញ្ជាក់​ពី​ការភ័យខ្លាច​កាន់តែខ្លាំង​ឡើង​ នៃ​ការ​លុកលុយ​របស់​រុស្ស៊ី​ដែល​អាច​កើតមាន​នៅពេល​ណាមួយ បន្ទាប់ពី​ការធ្វើ​សមយុទ្ធ​យោធា​ជាច្រើន​ខែដោយ​ទីក្រុង​មូ​ស្គូ ដែលបានធ្វើឱ្យមាន​ភាព​តានតឹង​កើន​ឡើងជា​បន្តបន្ទាប់​ជាមួយ​អង្គការ NATO​ ដែលជា​សម្ព័ន្ធមិត្ត​យោធា​របស់​បណ្ដា​ប្រទេស​មហាអំណាច​លោកខាងលិច​។​ ​ថ្លែង​នៅ​ទីក្រុង​ព្រុ​ច​សែ​ល បន្ទាប់ពី​កិច្ចពិភាក្សា​ជាមួយ​រដ្ឋមន្ត្រីការបរទេស​ហ្វាំ​ង​ឡង់ និង​ស៊ុយអែត ប្រធាន​សម្ព័ន្ធ​ NATO លោក Jens Stoltenberg បាន​និយាយថា អង្គការ​ NATO នឹងតែងតែ​ធ្វើ​អ្វីដែល​ចាំបាច់​ដើម្បី​ទប់ទល់ និង​ការពារ​សម្ព័ន្ធមិត្ត​រប​ស់​យើងទាំងអស់គ្នា​។​

​រុស្ស៊ី​បាន​នឹង​កំពុង​បង្កើន​កងកម្លាំង និង​យោ​ទ្ធោ​បក​រណ៍​នៅ​ជិត​ព្រំដែន​របស់ខ្លួនជាមួយអ៊ុយ​ក្រែ​នតាំងពី​ឆ្នាំមុន​ ហើយ​កំពុង​បញ្ជូន​កងទ័ពទៅកាន់​ប្រទេស​បេឡា​រុស្សដែល​នៅ​ជិតខាង​ ដើម្បី​ធ្វើសមយុទ្ធយោធា​រួមគ្នា​នៅ​ខែក្រោយ ដែល​ក្រុមមន្ត្រី​អ៊ុយ​ក្រែ​ន​បារម្ភ​ថា​អាចជាឆាកល្ខោន​ប្រតិបត្តិការ​ពេញលេញដែល​នឹង​ចាប់ផ្តើម​ការវាយប្រហារ​។​ ​ក្រុមមន្ត្រី​ចារកម្ម​អាមេរិកបាន​និយាយថា ពួកគេ​មិនដឹងថា តើ​ប្រធានាធិបតី​រុស្ស៊ីលោក Vladimir Putin បានសម្រេច​ចិត្ត​ឈ្លានពាន​អ៊ុយ​ក្រែ​ន ឬ​យ៉ាងណា​នោះទេ​។ វិមាន​ក្រឹម​ឡាំង​បាន​បដិសេធម្តង​ហើយ​ម្តង​ទៀតថា​ ខ្លួន​គ្មាន​ផែនការ​ធ្វើ​ដូច្នេះ​ទេ ប៉ុន្តែ​បាន​អះអាងថា ការគាំទ្រ​របស់​ NATO សម្រាប់ប្រទេស​នេះ​គឺជា​ការគំរាមកំហែងកាន់តែខ្លាំង​ឡើង​នៅលើ​ផ្នែក​ខាងលិចរបស់​រុស្ស៊ី​៕

អត្ថបទ៖ សុខមាន