ការទម្លាក់គ្រាប់បែកមិនរើសមុខរបស់យោធាអ៊ីស្រាអែលលើទីក្រុង ហ្កាហ្សា កំពុងធ្វើឲ្យភូមិឋាននានាក្លាយជាគំនរថ្មបាក់បែក បង្ខំឱ្យអ្នកស្រុកភៀសខ្លួនដោយភ័យស្លន់ស្លោ និងគ្មានកន្លែងមានសុវត្ថិភាពនៅក្នុងដែនដីរងការឡោមព័ទ្ធដែលស្ថិតនៅក្រោមការទម្លាក់គ្រាប់បែកឥតឈប់ឈរអស់រយៈពេល ២៣ខែ។

ការវាយប្រហារពេញមួយយប់របស់អ៊ីស្រាអែលទៅលើអ្វីដែលអង្គការយូនីសេហ្វ បានហៅថា "ទីក្រុងនៃការភ័យខ្លាច" រួមមានការវាយប្រហារលើតង់មួយក្នុងសង្កាត់ Tal al-Hawa កាលពីថ្ងៃព្រហស្បតិ៍ ដែលបានបំផ្លាញគ្រួសារទាំងមូលសម្លាប់មនុស្ស ៥ នាក់រួមទាំងកុមារបីនាក់ផងដែរ។

ពលរដ្ឋប៉ាឡេស្ទីន ឈ្មោះ Israa al-Basous បានប្រាប់ទីភ្នាក់ងារព័ត៌មានមួយ ថា "កូនៗរបស់អ្នកស្រី និងអ្នកស្រី កំពុងសម្រាកនៅក្នុងតង់ នៅពេលពួកគេឮសំឡេងការទម្លាក់គ្រាប់បែក។ហើយកូនបួននាក់របស់អ្នកស្រី បានចាប់ផ្តើមស្រែកយ៉ាងខ្លាំង ។

ការវាយប្រហារត្រូវបានគេរាយការណ៍នៅក្នុងសង្កាត់ Zeitoun, Sabra, Tuffah, Nassr និង Shujayea នៃទីក្រុងហ្កាហ្សា ខណៈយោធាបានលុបបំបាត់ភូមិឋានទាំងមូលក្នុងគោលបំណងបណ្តេញប្រជាជនប្រមាណមួយលាននាក់ចេញពីទីក្រុងដ៏ធំបំផុតរបស់ដែនដីហ្កាហ្សាមួយនេះ។

យោងតាមលោក Mahmoud Basal អ្នកនាំពាក្យនៃសេវាសង្គ្រោះបន្ទាន់របស់ដែនដីនេះ បានឱ្យដឹងថា ការបំផ្ទុះគ្រាប់បែកយ៉ាងខ្លាំងក្លានៅក្នុងសង្កាត់ Tuffah បានសម្លាប់មនុស្សយ៉ាងហោចណាស់៨ និងរាប់សិបនាក់រងរបួស៕