ប្រព័ន្ធផ្សព្វផ្សាយក្នុងស្រុករបស់ថៃ បានរាយការណ៍នៅថ្ងៃសុក្រ (៥ កញ្ញា) នេះថា ត្រឹម​តែ​មួយ​យប់​ប៉ុណ្ណោះនៅមុនពេលសភាត្រៀមបោះឆ្នោតរើសនាយករដ្ឋមន្ត្រីទី៣២ របស់ប្រទេសថៃ - ដែល​ស្ទើរតែប្រាកដថាមេដឹកនាំបក្សភូមិចៃថៃ លោក Anutin Charnvirakul ជា​អ្នក​ទទួល​បាន​តំណែង​ថ្មី ដោយសារការគាំទ្រពីបក្សប្រជាជនថៃដ៏ធំបំផុតក្នុងសភា - អតីតនាយករដ្ឋ​មន្ត្រី​ថៃ​ដ៏​ចម្រូង​ចម្រាសលោក ថាក់ស៊ីន ស៊ីណាវ៉ាត់ បានបង្កការភ្ញាក់ផ្អើល ជាមួយនឹងការ​ចាក​ចេញ​យ៉ាង​ទាន់​ហន់​ពី​ប្រទេសថៃ ក្រោមហេតុផល "ពិនិត្យសុខភាព" នៅសិង្ហបុរី ប៉ុន្តែបានចុះ​ចត​នៅ​ទិស​ដៅ​ផ្សេង​ទៅវិញ។

ជំនួសឱ្យការ​បញ្ចុះបញ្ចូលរកសំឡេងឆ្នោតដើម្បីបង្វែរលទ្ធផលត្រឡប់ទៅបេក្ខជនបក្សភឿថៃ និង​ជំរុញ​ឱ្យមា​នការរំលាយសភា លោក ថាក់ស៊ីន បែរជាចាកចេញ​យ៉ាង​ស្ងាត់ៗ​ដោយ​មិន​ប្រកាស​ជា​មុន​។ ​ការចាកចេញនេះបានក្លាយជាព័ត៌មានសំខាន់នាល្ងាចថ្ងៃទី៤ ខែកញ្ញា នៅពេល​នគរបាល​អន្តោ​ប្រ​វេសន៍នៅអាកាសយានដ្ឋានដនមឿង បានឃាត់​ខ្លួន​លោក​ជា​ច្រើន​ម៉ោង​ដើម្បី​ផ្ទៀង​ផ្ទាត់​ឯកសារ ​មុនពេលអនុញ្ញាតឱ្យចាកចេញបាន។

មនុស្សជាច្រើនជឿថា លោកបានរត់ភៀសខ្លួនទៅនៅបរទេសជាថ្មីម្ដងទៀត មុនពេល​សេចក្ដី​សម្រេច​របស់​តុលាការដ៏សំខាន់ ទាក់ទងនឹង "សំណុំរឿងដេកពេទ្យវីអាយភីជាន់ទី១៤" របស់​លោក នៅថ្ងៃទី៩ ខែកញ្ញា ដ៏ឆាប់ខាងមុខនេះ។ ប្រភពស្និទ្ធនឹងលោក ថាក់ស៊ីន បានអះអាងថា លោក​ធ្វើដំណើរទៅសិង្ហបុរី ដើម្បីពិនិត្យសុខភាពរយៈពេល ២ថ្ងៃ ដោយច្រានចោ​ល​ពាក្យ​ចចា​ម​អារ៉ាម​ពី​ការ​រត់ចោលស្រុក។ ទោះយ៉ាងនេះក្ដី ប្រព័ន្ធតាមដាន​ជើង​ហោះ​ហើរសា​ធារ​ណៈ​បា​ន​បង្ហា​ញថា លោក ថាក់ស៊ីន មិនបានទៅសិង្ហបុរីទេ ដោយយន្តហោះរបស់​លោក​ហោះ​លើ​មហា​សមុ​ទ្រ​ឥណ្ឌា​ភាគ​ខាង​កើត​នៃទីក្រុង Chennai ដោយឆ្ពោះទៅទីក្រុងឌុយបៃ ជាទីដែលលោកមានវីឡា​ដ៏ធំ​មួយ​នៅទីនោះ អំឡុងពេលនិរទេសខ្លួនជាយូរកាលពីមុន។ ក្រោយមក សញ្ញាតាម​ដាន​ក៏​បាត់​ពី​ប្រព័ន្ធ​ត្រួត​ពិនិត្យសាធារណៈ។

ទោះបីជាមានការសន្យាថាវិលវិញក៏ដោយ ការចាកចេញភ្លាមៗមុនសេចក្ដីសម្រេចរបស់តុលាការ និងការផ្លាស់ប្តូររដ្ឋាភិបាលថ្មី ជំរុញឱ្យមានការរំពឹងទុកថា លោក ថាក់ស៊ីន កំពុងរត់គេចខ្លួន ទាំង​បណ្តោះអាសន្ន ឬរយៈពេលវែង។ ដោយសារប្រវត្តិនិរទេសខ្លួន ១៧ឆ្នាំ​របស់​លោក​ពី​អ្វី​ដែល​លោក​ហៅ​ថា​ការ​ធ្វើទុក្ខបុកម្នេញផ្នែកនយោបាយ និងការដកតំណែងនាពេលថ្មីៗនេះរបស់កូនស្រីលោក គឺអតីតនាយករដ្ឋមន្រ្តីថៃ លោកស្រី ផែថងថាន ស៊ីណាវ៉ាត់ ដោយតុលាការធម្មនុញ្ញ — លោក ថាក់ស៊ីន ប្រហែលជាកំពុងរៀបចំសម្រាប់អវត្តមានជាថ្មីម្ដងទៀតពីនយោបាយថៃ៕