​វាយ​កូន​បាល់៖ ​កីឡាករ​វាយ​កូន​បាល់​រុស្ស៊ី Daniil Medvedev បាន​បន្តដំណើរ​ឡើង​វគ្គ ៨នាក់​ចុងក្រោយ Grand Slam, Australian Open ក្រោយ​យកឈ្នះ​យ៉ាង​តានតឹង​លើ​កីឡាករ​អាមេរិក Maxime Cressy​។ ​​Medvedev ដែល​មិន​សប្បាយចិត្ត ​បន្ទាប់ពី​មិនបាន​ប្រកួត​ក្នុង​កីឡដ្ឋាន​ធំ​នោះបាន​យកឈ្នះ​ពីរ​សិត​ដំបូង ៦-២ និង ៧-៦(៧-៤) មុន​ពេលដែល​កីឡាករ​អាមេរិក Maxime Cressy យកឈ្នះ​មួយ​សិត​វិញ ៧-៦(៧-៤​។

​​យ៉ាងណាក្តី​កីឡាករ​វ័យ ២៥ឆ្នាំ​រុស្ស៊ី​រូបនេះ​បាន​យកឈ្នះ​នៅ​សិត​ទី​បួន ៧-៥ ដើម្បី​ឡើង​វគ្គ ៨នាក់​ចុងក្រោយ​ជួប​ជាមួយ​កីឡាករ​កាណាដា Felix Auger-Alliasime​។ ​​កីឡាករ​កាណាដា​លំដាប់​លេខ ៩ Alliasime ឡើងមក​ដល់​វគ្គ​នេះ​ក្រោយ​ទំលាក់​កីឡាករ​ក្រូ​អាស៊ី Marin Cilic ដោយ​លទ្ធផល ២-៦, ៧-៦(៩-៧), ៦-២ និង ៧-៦(៧-៤)​។ ​​ងាក​មក​កីឡាករ​អ៊ីតាលី Jannik Sinner ក៏​ឡើង​វគ្គ​បន្ទាប់​ផងដែរ​ក្រោយ​យកឈ្នះ​កីឡាករ​ម្ចាស់ផ្ទះ​អូស្ត្រាលី Alex de Minaur ៧-៦(៧-៣), ៦-៣ និង ៦-៤​។ ​​Jannik Sinner នឹង​បង្ហាញខ្លួន​លើកដំបូង​របស់ខ្លួន​នៅ​វគ្គ ៨នាក់​ចុងក្រោយ Australian Open ដោយ​នឹង​ជួប​ជាមួយ​កីឡាករ​ក្រិ​ក Stefanos Tsitsipas​។

​​កីឡាករ​ក្រិ​ក​លំដាប់​លេខ ៤ រូបនេះ​ប្រកួត​គូ​ចុងក្រោយ​គេ​នៅ​ថ្ងៃ​ចន្ទ​ម្សិលមិញ ក៏​ជាការ​ប្រកួត​ដ៏​តានតឹង​ដែរ​ទំរាំ​រកចាញ់ឈ្នះ​បាន​នៅ​ពេល​ជួប​ជាមួយ​កីឡាករ​អាមេរិក Taylor Fritz​។ ​​កីឡាករ​វ័យ ២៣ឆ្នាំ​ក្រិ​កបាន​តាម​ពីក្រោយ​ដល់​ទៅ​ពីរលើក​មុនពេល​យកឈ្នះ​ក្នុង​លទ្ធផល ៣ សិត ២ ពិន្ទុ ៤-៦, ៦-៤, ៤-៦, ៦-៣ និង ៦-៤​។ ​នេះ​ជាការ​ឈានឡើង​វគ្គ ៨នាក់​ចុងក្រោយ​ជា​លើក​ទី៣ សំរាប់ Tsitsipas នៅ Australian Open នេះ​និង​ជាការ​បន្តដំណើរ​ស្វែង​រកពាន Grand Slam លើកដំបូង​ក្នុង​អាជីព​ផងដែរ​៕

​អត្ថបទ​៖​នាង សុភា​វុ​ធ