អាជ្ញាធរបានរកឃើញសាកសពមនុស្សរាប់រយនាក់ដែលបានស្លាប់នៅក្នុងបំណាក់ដីនៅភូមិតំបន់ភ្នំដាច់ស្រយាលមួយកន្លែងក្នុងតំបន់ Darfur ភាគខាងលិចប្រទេសស៊ូដង់ ដែលគ្រប់គ្រងដោយក្រុមឧទ្ទាម។

លោក Ibrahim Suleiman មន្ត្រីជាន់ខ្ពស់ក្នុងរដ្ឋបាលស៊ីវិលនៃមូលដ្ឋាន Daramo ជាកន្លែងដែលភូមិ Tarasinស្ថិតនៅ បានរាយការណ៍នៅក្នុងវីដេអូមួយដែលបានចេញផ្សាយដោយចលនារំដោះស៊ូដង់កាលពីថ្ងៃព្រហស្បតិ៍ថា សាកសពមនុស្សចំនួន៣៧០ត្រូវបានរកឃើញនិងបានបញ្ចុះ។ លោកនិយាយថា មនុស្សជាច្រើននាក់ទៀតនៅតែជាប់ខ្លួននៅក្រោមគំនរបាក់បែក ឬត្រូវបានទឹកជំនន់ហូរនាំ។

បំណាក់ដីកាលពីថ្ងៃទី៣១ ខែសីហា ដែលបានកើតឡើងក្រោយពីភ្លៀងធ្លាក់ខ្លាំងជាច្រើនថ្ងៃនៅភូមិ Tarasin នៅតំបន់ភ្នំ Marrah បានបណ្តាលឲ្យមនុស្សជាង១.០០០នាក់ស្លាប់។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បានប៉ាន់ស្មានចំនួនអ្នកស្លាប់ស្រដៀងគ្នានេះ ប៉ុន្តែបាននិយាយថា វាពិបាកក្នុងការបញ្ជាក់ពីទំហំនៃសោកនាដកម្ម ដោយសារតែតំបន់នេះពិបាកចូលទៅដល់។

អង្គការសហប្រជាជាតិបាននិយាយថា កិច្ចខិតខំប្រឹងប្រែងត្រូវបានប្រមែប្រមូលដើម្បីគាំទ្រដល់តំបន់រងគ្រោះដែលមានទីតាំងចម្ងាយជាង៩០០គីឡូម៉ែត្រភាគខាងលិចរដ្ឋធានី Khartoum៕