ប្រព័ន្ធផ្សព្វផ្សាយរដ្ឋកូរ៉េខាងជើង KCNA បាននិយាយនៅថ្ងៃសុក្រ (៥ កញ្ញា) នេះថា មេដឹកនាំកូរ៉េខាងជើង លោក Kim Jong Un បានប្រាប់លោកប្រធានាធិបតីចិន Xi Jinping ថា កូរ៉េខាងជើង នឹងបន្តគាំទ្រទីក្រុងប៉េកាំង ក្នុងការការពារអធិបតេយ្យភាព ទឹកដី និងផលប្រយោជន៍អភិវឌ្ឍន៍របស់ចិន។

KCNA រាយការណ៍ថា លោក Kim បានប្រាប់ទៅកាន់លោក Xi ក្នុងអំឡុងជំនួបទ្វេភាគីនៅទីក្រុងប៉េកាំង កាលពីថ្ងៃព្រហស្បតិ៍ថា "មិនថាស្ថានភាពអន្តរជាតិផ្លាស់ប្តូរយ៉ាងណាទេ អារម្មណ៍នៃមិត្តភាពមិនអាចផ្លាស់ប្តូរបានឡើយ" រវាងកូរ៉េខាងជើង និងចិន។ ចំណែកលោក Xi បានប្រាប់លោក Kim វិញថា ចិន និងកូរ៉េខាងជើង គឺជា "អ្នកជិតខាងល្អ មិត្តល្អ និងសមមិត្តល្អ" ដែលចែករំលែកជោគវាសនាតែមួយ នេះបើយោងតាមរបាយការណ៍ KCNA ។

ប្រព័ន្ធផ្សព្វផ្សាយនេះរាយការណ៍ទៀតថា ថ្នាក់ដឹកនាំទាំងពីរបានពិភាក្សាពីការពង្រឹងកិច្ចសហប្រតិបត្តិការជាយុទ្ធសាស្ត្រ និងការពារផលប្រយោជន៍រួមក្នុងបញ្ហាអន្តរជាតិ និងតំបន់ ព្រមទាំងការធ្វើទស្សនកិច្ចបន្ថែមទៀតក្នុងចំណោមមន្ត្រីជាន់ខ្ពស់នៃប្រទេសទាំងពីរ ក៏ដូចជាទំនាក់ទំនងយុទ្ធសាស្ត្រផងដែរ។

KCNA បានបញ្ជាក់ថា លោក Kim បានចាកចេញពីទីក្រុងប៉េកាំង នៅថ្ងៃព្រហស្បតិ៍ ត្រឡប់ទៅកូរ៉េខាងជើងវិញ ហើយថា ដំណើរទស្សនកិច្ចរបស់លោក Kim ទៅកាន់ប្រទេសចិន "បានក្លាយឱកាសដ៏ប្រវត្តិសាស្ត្រ ដែលពង្រឹងបន្ថែមទៀតនូវទំនុកចិត្តផ្នែកនយោបាយ និងកិច្ចសហប្រតិបត្តិការជាយុទ្ធសាស្រ្តរវាងប្រទេសទាំងពីរ"៕