មន្ត្រីជាន់ខ្ពស់របស់អង្គការកុមារ យូនីសេហ្វ (UNICEF) កាលពីថ្ងៃព្រហស្បតិ៍ (៤ កញ្ញា) បានព្រមានថា រឿងរ៉ាវដែលមិនអាចនឹកស្មានដល់ កំពុងខិតទៅជិតទីក្រុងហ្កាហ្សា ដែលជាជម្រកចុងក្រោយសម្រាប់ជនភៀសខ្លួនប៉ាឡេស្ទីននៅភាគខាងជើងដែនដីហ្កាហ្សាស្ទ្រីប ហើយទីក្រុងដ៏ធំបំផុតរបស់ដែនដីនេះកំពុងក្លាយជាទីកន្លែង «ដែលកុមារភាពមិនអាចរស់រានបាន»។

ប្រធានផ្នែកទំនាក់ទំនងរបស់អង្គការយូនីសេហ្វ សម្រាប់មជ្ឈិមបូព៌ា និងអាហ្រ្វិកខាងជើង លោកស្រី Tess Ingram បាននិយាយក្នុងសន្និសីទសារព័ត៌មានមួយថា៖ ទីក្រុងហ្កាហ្សា កំពុងក្លាយជាទីកន្លែងដែលកុមារភាពមិនអាចរស់បានឡើយ ជាទីក្រុងពោរពេញដោយភាពភ័យខ្លាច ការរត់ភៀសខ្លួន និងពិធីបុណ្យសព... អ្វីដែលមិននឹកស្មានដល់ជិតលេចចេញជារូបរាង ហើយការកើនឡើងនៃមហន្តរាយ កំពុងដំណើរការ។

លោកស្រីរៀបរាប់លម្អិតអំពីទិដ្ឋភាពដ៏អាក្រក់ជាមួយក្រុមគ្រួសារដែលត្រូវបង្ខំឱ្យភៀសខ្លួនជាច្រើនដង ដោយព្រមានថា ការដួលរលំនៃសេវាកម្មសំខាន់ៗកំពុងធ្វើឱ្យកុមារងាយរងគ្រោះបំផុតក្នុង "ការតស៊ូដើម្បីរស់រានមានជីវិត" នៅតំបន់ហ្កាហ្សា។ ដោយបញ្ជាក់សារជាថ្មីនូវការអំពាវនាវរបស់អង្គការយូនីសេហ្វដល់សអ៊ីស្រាអែល ឱ្យពិនិត្យមើលឡើងវិញនូវវិធានការការពារកុមារក្រោមច្បាប់មនុស្សធម៌អន្តរជាតិ លោកស្រីក៏បានជំរុញឱ្យសហគមន៍អន្តរជាតិ "ប្រើប្រាស់ឥទ្ធិពលរបស់ពួកគេដើម្បីបញ្ចប់រឿងនេះ កុំបង្អង់យូរទៀត"។

លោកស្រី Ingram បានគូសបញ្ជាក់ពីតម្រូវការមូលនិធិបន្ទាន់ ដោយនិយាយថា យូនីសេហ្វត្រូវការប្រាក់ ៧១៦លានដុល្លារ សម្រាប់ប្រតិបត្តិការឆ្លើយតបនៅហ្កាហ្សា របស់ខ្លួនក្នុងឆ្នាំ២០២៥នេះ ប៉ុន្តែមកទល់ពេលនេះ ទទួលបានមូលនិធិត្រឹមតែ ៣៩% ជាមួយនឹងអាហារូបត្ថម្ភត្រឹមតែ ១៧% ប៉ុណ្ណោះ៕