រដ្ឋមន្ត្រីការបរទេសអាមេរិក លោក Marco Rubio បាននិយាយកាលពីថ្ងៃព្រហស្បតិ៍ (៤ កញ្ញា) ថា សហរដ្ឋអាមេរិក បានប្រាប់ទៅកាន់ប្រទេសផ្សេងៗទៀតថា ការទទួលស្គាល់រដ្ឋប៉ាឡេស្ទីន នឹងបង្កឱ្យមានបញ្ហាស្មុគស្មាញកាន់តែច្រើន។

ថ្លែងពីរដ្ឋធានីអេក្វាឌ័រ លោក Rubio បាននិយាយថា៖ "អាមេរិក បានប្រាប់ប្រទេសទាំងអស់នោះថា ប្រសិនបើពួកគេធ្វើការទទួលស្គាល់ ដែលសុទ្ធតែជារឿងក្លែងក្លាយទាំងអស់នេះ នោះនឹងបង្កើតបញ្ហាថែមទៀត" ដោយមិនលើកឈ្មោះថាប្រទេសណាខ្លះទេ។

ប្រមុខការបរទេសអាមេរិករូបនេះក៏បានលើកឡើងដោយមិនបញ្ជាក់លម្អិតថា "នឹងមានការឆ្លើយតបវិញ ហើយជំហាននោះនឹងធ្វើឱ្យកាន់តែពិបាកមានបទឈប់បាញ់ ហើយក៏អាចបង្កឱ្យមានសកម្មភាពដែលធ្លាប់បានឃើញកន្លងមកដែរ"។ ជាមួយគ្នានេះ លោក Rubio ក៏បានសម្ដែងការមិនយល់ស្របលើកិច្ចពិភាក្សារបស់អ៊ីស្រាអែល ពីការដាក់បញ្ចូលតំបន់ West Bank ជាឧបសម្ព័ន្ធនោះ ប៉ុន្តែសង្កត់ធ្ងន់ថា គំនិតនេះក៏មិនមែនជាការសម្រេចចុងក្រោយដែរ។

អង់គ្លេស បារាំង កាណាដា អូស្ត្រាលី និងបែលហ្ស៊ិក សុទ្ធតែបាននិយាយថា ពួកគេនឹងទទួលស្គាល់រដ្ឋប៉ាឡេស្ទីន នៅក្នុងមហាសន្និបាតអង្គការសហប្រជាជាតិ នៅចុងខែនេះ។ គិតត្រឹមខែមេសា ឆ្នាំ២០២៥ មានប្រទេសចំនួន១៤៧ ដែលតំណាងឱ្យ ៧៥% នៃសមាជិកអង្គការសហប្រជាជាតិ បានទទួលស្គាល់ភាពជារដ្ឋរបស់ប៉ាឡេស្ទីនរួចហើយ៕