ប្រព័ន្ធផ្សព្វផ្សាយក្នុងស្រុករបស់អ៊ីស្រាអែលរាយការណ៍ថា នៅពេលប្រទេសនេះ ត្រៀមរៀបចំបើកយុទ្ធនាការជើងគោកថ្មីមួយនៅទីក្រុងហ្កាហ្សា មន្ត្រីយោធា IDF និយាយថា ពួកគេខ្លាចថាក្រុមហាម៉ាស អាចប្រើភាពវឹកវរនៃការជម្លៀសជនស៊ីវិលទ្រង់ទ្រាយធំនៅទីនោះ ដើម្បីផ្លាស់ទីចំណាប់ថ្នូរដែលឃុំខ្លួនក្នុងដែនដីហ្កាហ្សាស្រ្ទីប ដោយសម្ងាត់។

ក្នុងប៉ុន្មានថ្ងៃថ្មីៗនេះ កងទ័ពជូនដំណឹងដល់ក្រុមគ្រួសារចំណាប់ថ្នូរថា ខ្លួនមានបំណងធានាថា អ្នកជាប់ឃុំទាំងនោះមិនមានគ្រោះថ្នាក់ឡើយក្នុងប្រតិបត្តិការនេះ ជាផ្នែកមួយនៃយុទ្ធនាការទូលំទូលាយឈ្មោះ Gideon's Chariots II។ ក្រុមមន្រ្តីជឿថា ចំណាប់ថ្នូរកំពុងត្រូវឃុំខ្លួនក្នុងក្រុងហ្កាហ្សា ប៉ុន្តែក៏និយាយថា ពុំមានភស្តុតាងចារកម្មគ្រប់គ្រាន់ពីទីតាំងជាក់លាក់ឡើយ ដែលនេះជាកត្តាដ៏ហានិភ័យបំផុត។

នាយសេនាធិការ IDF លោក Eyal Zamir បានបញ្ជាកងកម្លាំងឱ្យធ្វើសកម្មភាពដោយប្រុងប្រយ័ត្ន ដោយរំពឹងថា ក្រុមហាម៉ាសអាចផ្លាស់ទីចំណាប់ថ្នូរទៅភាគខាងត្បូង ក្រោមការភាពច្របូកច្របល់នៃប្រជាជនប៉ាឡេស្ទីនរាប់ម៉ឺននាក់ដែលភៀសខ្លួនចេញពីទីក្រុងហ្កាហ្សា ភាគខាងជើង។

មន្ត្រីអ៊ីស្រាអែលនិយាយថា ក្រុមហាម៉ាសធ្លាប់ប្រើយុទ្ធសាស្ត្រនេះពីមុន ដោយក្លែងបន្លំចំណាប់ថ្នូរជាអ្នកប្រយុទ្ធ ឬលាក់អត្តសញ្ញាណពួកគេ ក្នុងពេលបញ្ជូនខ្លួនអ្នកទាំងនោះចេញដោយថ្មើរជើង។ ចំណាត់ការបែបនេះបានបង្កភាពស្មុគស្មាញដល់ការវាយប្រហាររបស់អ៊ីស្រាអែល ដូចជានៅក្រុងរ៉ាហ្វា កាលពីខែសីហាឆ្នាំមុនជាដើម។ នៅចុងខែដដែលនោះ ក្រុមហាម៉ាស បានប្រហារជីវិតចំណាប់ថ្នូរ ៦នាក់ ដែលឃុំខ្លួននៅផ្លូវរូងក្រោមដីក្នុងសង្កាត់ Tel al-Sultan របស់ក្រុងរ៉ាហ្វា ដោយសារភាពទាល់ច្រក៕