ក្រសួងការពារជាតិអាមេរិក បាននិយាយថា យន្តហោះចម្បាំងវ៉េណេហ្ស៊ុយអេឡា ពីរគ្រឿង បានហោះទៅជិតនាវាកងទ័ពជើងទឹកអាមេរិក នៅក្នុងដែនទឹកអន្តរជាតិ។

ក្រសួងបាននិយាយនៅក្នុងសេចក្តីថ្លែងការណ៍មួយថា៖«ថ្ងៃនេះ យន្តហោះយោធាចំនួន ពីរគ្រឿង របស់របបប្រធានាធិបតីវ៉េណេហ្ស៊ុយអេឡាលោក នីកូឡាស ម៉ាឌូរ៉ូ បានហោះហើរនៅជិតនាវាកងទ័ពជើងទឹកសហរដ្ឋអាមេរិក នៅក្នុងដែនទឹកអន្តរជាតិ។

សេចក្តីថ្លែងការណ៍ បានបញ្ជាក់ថា៖«ក្រុមជួញដូរគ្រឿងញៀនដែលកំពុងគ្រប់គ្រងវ៉េណេហ្ស៊ុយអេឡា ត្រូវបានណែនាំយ៉ាងច្បាស់ៗ កុំឲ្យបន្តកិច្ចខិតខំប្រឹងប្រែងបន្ថែមទៀត ដើម្បីបង្កឧបសគ្គ រារាំង ឬជ្រៀតជ្រែកជាមួយប្រតិបត្តិការប្រឆាំងគ្រឿងញៀន និងប្រឆាំងភេរវកម្ម ដែលធ្វើឡើងដោយយោធាអាមេរិក»។

ប្រធានាធិបតីអាមេរិក លោក ដូណាល់ ត្រាំ បាននិយាយកាលពីថ្ងៃអង្គារថា ក្នុងអំឡុងប្រតិបត្តិការមួយ ក្នុងដែនទឹកអន្តរជាតិ យោធាអាមេរិក បានសម្លាប់សមាជិក ១១នាក់ របស់ក្រុមជួញដូរគ្រឿងញៀន Tren de Aragua នៅប្រទេសវ៉េណេហ្ស៊ុយអេឡា។ លោក ត្រាំ បានចោទប្រកាន់រដ្ឋាភិបាលវ៉េណេស៊ុយអេឡាថា មិនបានចាត់វិធានការគ្រប់គ្រាន់ ដើម្បីប្រយុទ្ធប្រឆាំងនឹងការជួញដូរគ្រឿងញៀន ហើយទីក្រុងវ៉ាស៊ីនតោន នៅតែបន្តចោទប្រកាន់លោក ម៉ាឌូរ៉ូ ថា បានជាប់ពាក់ព័ន្ធនឹងក្រុមជួញដូរគ្រឿងញៀន Cartel de los Soles ជាការចោទប្រកាន់ ដែលទីក្រុងការ៉ាកាស (Caracas)បានបដិសេធ៕