វិមានក្រឹមឡាំង នៅថ្ងៃសុក្រ (ទី៥ ខែកញ្ញា) នេះ បានឲ្យដឹងថា ការធានាសន្តិសុខសម្រាប់អ៊ុយក្រែន មិនអាចត្រូវបានផ្តល់ឲ្យដោយភាគីយោធាបរទេសបានឡើយ ហើយការងារជាច្រើន ត្រូវធ្វើឲ្យរួចរាល់ មុនពេលមានកិច្ចប្រជុំកម្រិតខ្ពស់ ឬកំពូល រវាងទីក្រុងមូស្គូ និងទីក្រុងគីវ ស្តីពីការដោះស្រាយជម្លោះ ក្នុងប្រទេសអ៊ុយក្រែន។

គួរបញ្ជាក់ថា កាលពីថ្ងៃព្រហស្បតិ៍ ប្រទេសចំនួន ២៦ បានសន្យាផ្តល់ការធានាសន្តិសុខ ក្រោយសង្គ្រាមដល់អ៊ុយក្រែន ដែលរួមមានកងកម្លាំងអន្តរជាតិ ទាំងនៅលើដី ទឹក និងអាកាស។

នៅខាងក្រៅវេទិកាសេដ្ឋកិច្ចបូព៌ា ក្នុងទីក្រុង Vladivostok អ្នកនាំពាក្យរបស់វិមានក្រឹមឡាំង លោក Dmitry Peskov បានប្រាប់ទីភ្នាក់ងារសារព័ត៌មានរដ្ឋ RIA របស់រុស្ស៊ីថា៖ «តើការធានាសន្តិសុខរបស់អ៊ុយក្រែនអាចត្រូវបានធានា និងផ្តល់ដោយទ័ពជំនួយបរទេស ជាពិសេសអឺរ៉ុប និងសហរដ្ឋអាមេរិក បានទេ? នេះមិនអាចចាត់ទុកជាការធានាសន្តិសុខ សម្រាប់អ៊ុយក្រែន ដែលអាចទទួលយកបានឡើយ សម្រាប់ប្រទេសរបស់យើង»។

ទោះបីជាមានកិច្ចប្រឹងប្រែងរបស់លោកប្រធានាធិបតីអាមេរិក លោក Donald Trump ក្នុងការស្វែងរកដំណោះស្រាយបញ្ចប់ជម្លោះក៏ដោយ ក៏វាហាក់បីដូចជាគ្មានសញ្ញាអាចពន្លត់ភ្លើងសង្គ្រាមដែលរុស្ស៊ីបានចាប់ផ្តើមជាមួយនឹងការលុកលុយទ្រង់ទ្រាយធំលើអ៊ុយក្រែន ក្នុងខែកុម្ភៈ ឆ្នាំ២០២២។

ជាមួយគ្នានេះ លោក Peskov ក៏បានប្រាប់សារព័ត៌មាន RIA ផងដែរថា ការធានាសន្តិសុខដែលត្រូវការទាំងអស់ សម្រាប់អ៊ុយក្រែន ត្រូវមាននៅក្នុងលក្ខខណ្ឌនៃកិច្ចព្រមព្រៀងដែលបានឈានដល់ អំឡុងកិច្ចចរចាសន្តិភាព នៅទីក្រុងអ៊ីស្តង់ប៊ុល ប្រទេសទួរគី ក្នុងឆ្នាំ២០២២។

ក្រោមក្របខណ្ឌទីក្រុងអ៊ីស្តង់ប៊ុល អ៊ុយក្រែននឹងបោះបង់មហិច្ឆតាចូលរួមជាមួយអង្គការណាតូ (NATO) ហើយទទួលយកឋានៈអព្យាក្រឹត និងគ្មានអាវុធនុយក្លេអ៊ែរ។ ជាថ្នូរវិញ ខ្លួននឹងទទួលបានការធានាសន្តិសុខពីសហរដ្ឋអាមេរិក រុស្ស៊ី ចិន អង់គ្លេស និងបារាំង៕